មានតែអាជីវកម្មទាក់ទងនឹងគ្រឿងឧបភោគ បរិភោគ អាចបន្តបើកតូបលក់ក្នុងផ្សារព្រែកជ្រៃ

COVID-19

ជាតិ

មានតែអាជីវកម្មទាក់ទងនឹងគ្រឿងឧបភោគ បរិភោគ អាចបន្តបើកតូបលក់ក្នុងផ្សារព្រែកជ្រៃ

20, Apr 2021 , 7:52 pm

រូបភាព

ដោយ: ហុង ស្រីណា

ភ្នំពេញ៖ គណៈគ្រប់គ្រងផ្សារព្រែកជ្រៃ សម្រេចបិទអាជីវកម្មលក់ដូរមួយចំនួននៅក្នុងផ្សារ លើកលែងតែ ការលក់ដូរគ្រឿងឧបភោគ បរិភោគ និងសម្ភារដែលជាតម្រូវការចាំបាច់ប្រចាំថ្ងៃប៉ុណ្ណោះ។

តាមសេចក្តីសម្រេចរបស់គណៈគ្រប់គ្រងផ្សារព្រែកជ្រៃដែលស្ថិតក្នុងខណ្ឌដង្កោ រាជធានីភ្នំពេញ ការផ្អាកអាជីវកម្មដែលមិនចាំបាច់ក្នុងផ្សារនាពេលនេះ គឺដើម្បីចូលរួមទប់ស្កាត់ការរីករាលដាលជំងឺកូវីដ-១៩ បើទោះជាមិនមានផ្ទុះជំងឺកូវីដ-១៩ ចេញផ្សារនេះ ក៏ដោយ។ នៅក្នុងសេចក្តីសម្រេចដដែល គណៈកម្មការផ្សារព្រែកជ្រៃ ក៏មិនទាន់កំណត់ពេល ឱ្យអាជីវករបើកឱ្យលក់ដូរវិញដែរ។

បើទោះជាអាជីវកម្មមួយចំនួន ត្រូវបានផ្អាកក៏ដោយ ក៏អ្នកគ្រប់គ្រងផ្សារ នៅតែអំពាវនាវឱ្យអាជីវករលក់គ្រឿងឧបភោគ បរិភោគទាំងអស់អនុវត្តនូវវិធានការ ៣ការពារ និង៣កុំ ឱ្យខ្ជាប់ខ្ជួនផងដែរ។

មកទល់ពេលនេះ នៅរាជធានីភ្នំពេញ មានផ្សារជាច្រើនបានបិទបណ្តោះអាសន្ន ក្រោយរកឃើញអ្នកលក់ដូរក្នុងផ្សារ រួមទាំងសន្តិសុខផង មានវិជ្ជមានកូវីដ-១៩។ ផ្សារខ្លះទៀត ក៏ត្រូវបិទទ្វារទាំងស្រុង ឬបិទផ្នែកខ្លះ ដើម្បីកាត់បន្ថយភាពចង្អៀតណែន ក្នុងផ្សារ និងបង្ការការរាលដាលនៃជំងឺកូវីដ-១៩។

បច្ចុប្បន្ន កម្ពុជាមានអ្នកកើតកូវីដ-១៩ សរុប៧៤៤៤នាក់ ក្នុងនោះ ៦៨៩៩នាក់ពាក់ព័ន្ធសហគមន៍២០កុម្ភៈ។ អ្នកសះស្បើយមាន២៥៥៥នាក់ និងស្លាប់៤៩នាក់៕