ទីស្តីការគណៈរដ្ឋមន្តី្រ បានបញ្ជាក់ថា ការជ្រើសរើសយកទីតាំងខាងលើ សម្រាប់ធ្វើជាកន្លែងបូជាសព អ្នកកើតជំងឺកូវីដ-១៩  គឺបានធ្វើឡើងបន្ទាប់ពីមានលិខិតរបស់ក្រសួងកសិកម្ម រុក្ខាប្រមាញ់ និង នេសាទ និងបន្ទាប់ពីមានសំណើសុំដីសម្រាប់សាងសង់ឈាបនដ្ឋានបូជាសពអ្នក កើតជំងឺកូវីដ-១៩ ដោយ សម្តេចហ៊ុន សែន បានឯកភាពលើសំណើនេះ ដោយផ្ទាល់ នៅថ្ងៃទី២២មេសា។

 

បើតាមលិខិតទីស្តីការគណៈរដ្ឋមន្រ្តី រាជរដ្ឋាភិបាលយល់ព្រមផ្ដល់ដី១កន្លែងទំហំជាង ២ហិកតា ត្រង់ចំណុចនិយាមកានៃប្រព័ន្ធកូអរដោនេ (WGS 84) ១-(៤៧០៨៧៥-១២០៦០៧៤) ២-(៤៧០៩៩៥-១២០៦១៩៣) ៣-(៤៧០៩១៨-១២០៦២៥២) ៤-(៤៧០៧៤៩-១២០៦១៩២) ស្ថិតក្នុងស្ថាននីយផ្សព្វផ្សាយ និងស្តាព្រៃឈើត្រពាំងធំ ក្នុងភូមិតាសែន ឃុំខ្វាវ ស្រុកទ្រាំង ខេត្តតាកែវ ដើម្បីសាងសង់ឈាបនដ្ឋានបូជាសពអ្នកកើតជំងឺកូវីដ-១៩។

 

សូមជម្រាបថា ក្រៅពីខេត្តតាកែវ រដ្ឋាភិបាលកន្លងមកក៏បានសម្រេចយកដីទំហំជាង១០ហិកតា នៅក្នុងស្រុកឱរ៉ាល់ ខេត្តកំពង់ស្ពឺ ធ្វើជាសម្រាប់បូជាសពអ្នកដែលទទួលមរណភាពដោយកូវីដ-១៩ ផងដែរ។ បច្ចុប្បន្ន  អាជ្ញាធរ និងមន្ត្រីអ្នកជំនាញពាក់ព័ន្ធកំពុងរៀបចំទីកន្លែងបូជាសពនេះ ខណៈឡសម្រាប់បូជា កំពុងដំឡើង។ 

 

បច្ចុប្បន្ន កម្ពុជាបានរកឃើញអ្នកមានវិជ្ជមានកូវីដ-១៩សុរប ៨ ១៩៣នាក់ ក្នុងនោះ ៧៦៤៨ នាក់ជាករណីសហគមន៍២០កុម្ភៈ។ អ្នកសះស្បើយ មានចំនួន ២៩២៤ ខណៈអ្នកស្លាប់ដោយសារកូវីដ-១៩ បានកើនដល់ ៥៩នាក់។ អ្នកជំងឺកូវីដ-១៩ បច្ចុប្បន្នមាន ៥២០៤នាក់ ក្នុងនោះអ្នកជំងឺ ២៧២៧នាក់ កំពុងរង់ចាំការបញ្ជូនទៅកន្លែងព្យាបាល។ អ្នកព្យាបាលនៅផ្ទះមានចំនួន ១៥នាក់៕