បើតាមរដ្ឋបាលខេត្តកំពង់ស្ពឺ ការផ្អាកបណ្ដោះអាសន្ននូវទីតាំងផ្សារខាងលើ គឺដោយសាររកឃើញពលរដ្ឋ២នាក់ ជាអ្នកចែកចាយបន្លែ មានវិជ្ជមានជំងឺកូវីដ-១៩។ 

 

លោក វ៉ី សំណាង អភិបាលខេត្តកំពង់ស្ពឺ បានរៀបរាប់ក្នុងសេចក្ដីជូនដំណឹងដូច្នេះ៖«ផ្អាកបណ្ដោះអាសន្នផ្សាត្រែងត្រយឹង ស្ថិតនៅភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងផ្នែកមួយនៃតូបលក់បន្លែ ក្នុងផ្សារត្រពាំងក្រឡឹង ស្ថិតនៅភូមិផ្សារត្រពាំងក្រឡឹង ឃុំគិរីវន្ត ស្រុកភ្នំស្រួច ខេត្តកំពង់ស្ពឺ»។ 

 

រដ្ឋបាលខេត្តកំពង់ស្ពឺ បានបញ្ជាក់ថា ការផ្អាកនេះ ក្រោយរកឃើញឈ្មោះ អូត សុខា ភេទស្រី អាយុ ៣៦ឆ្នាំ និងឈ្មោះ គីម សុផាត ភេទប្រុស អាយុ ៥៧ឆ្នាំ មានវិជ្ជមានជំងឺកូវីដ-១៩ ។ អ្នកទាំង២ ជាអ្នកយកបន្លែពីផ្សារនាគមាស មកលក់ចែកចាយនៅផ្សារត្រែងត្រយឹង និងផ្សារត្រពាំងក្រឡឹង។

 

គិតមកដល់ពេលនេះកម្ពុជាមានករណីឆ្លងវីរុសកូវីដ-១៩ ចំនួន ៨៨៤៨ករណី។ ករណីឆ្លងក្នុងព្រឹត្តិការណ៍សហគមន៍មានចំនួន ២៦១៨នាក់។ អ្នកកំពុងសម្រាកព្យាបាលមានចំនួនសរុប ៥៦៣៣នាក់។ ចំនួនអ្នកជាសះស្បើយសរុបចំនួន ៣១៤៨នាក់ ខណៈចំនួនអ្នកស្លាប់កើនដល់ ៦១នាក់៕