ក្លិបរហស្សនាមអ្នកមានបុណ្យ ស្ថិតក្នុងចំណោមក្លិបយក្សទាំង១២ ដែលចួលរួមគម្រោង ESL។ តែយ៉ាងណា ដោយសារភាពចម្រូងចម្រាស ដែលកើតឡើងដោយការរិះគន់ និងតវ៉ាយ៉ាងខ្លាំងដោយចោទថាក្លិបគិតតែលុយនោះ ក៏មានក្លិបចំនួន៩បានប្រកាសចាកចេញវិញ។
 

បើទោះក្លិបទាំង៩ចាកចេញក៏ដោយ ប៉ុន្តែប្រធានក្លិប Real Madrid លោក Florentino Perez និងប្រធានក្លិប Juventus លោក Andrea Agnelli ដែលជាឥស្សរជនឆ្នើមក្នុងការបង្កើងក្របខណ្ឌ Super League បានបង្ហាញពីការការពារយ៉ាងរឹងមាំ។ ពួកគេនៅតែជឿជាក់ថាពាននេះត្រូវតែកើតឡើង នៅពេលដែលក្លិបនានារងផលប៉ះពាល់ខាងសេដ្ឋកិច្ចដែលបណ្តាលមកពីជំងឺកូវីដ-១៩។
 

ស្របពេលគ្នានេះដែរ លោក Joan Laporta ប្រធានទើបជាប់ឆ្នោតថ្មីរបស់ក្លិប Barca ក៏យល់ឃើញដែលថា Super League ដែលនឹងរកប្រាក់បានច្រើនពិតជាចាំបាច់ណាស់សម្រាប់កីឡាបាល់ទាត់។
 

«បរិយាកាសសេដ្ឋកិច្ចសង្គម តម្រូវឱ្យមានបង្កើតទម្រង់ថ្មី ដើម្បីធានានិរន្តភាពហិរញ្ញវត្ថុនិងលទ្ធភាពនៃកីឡាបាល់ទាត់ពិភពលោកតាមរយៈការកែលម្អលើផលិតផលចាស់។ នៅក្នុងបរិបទនេះក្រុមប្រឹក្សាភិបាលរបស់ក្លិប Barcelona បានទទួលយកការផ្តល់ជូនដើម្បីបង្កើតជាសមាជិកស្ថាបនិក Super League ដែលជាការប្រកួតប្រជែងដែលត្រូវបានរៀបចំឡើងដើម្បីលើកកម្ពស់គុណភាព និងភាពទាក់ទាញនៃកីឡាបាលទាត់។» នេះជាការអះអាងរបស់លោក Laporta។
 

ប្រធានក្លិបសញ្ជាតិអេស្ប៉ាញរូបនេះ បន្ថែមថា ការសម្រេចចិត្តមិនចូលរួម ឬចាកចេញពី Super League អាចនឹងមានកំហុសជាប្រវត្តិសាស្រ្ត ដែលស្មើនឹងបោះបង់ចោលឱកាសក្លាយជាផ្នែកមួយនៃគម្រោងដើម្បីជួយវិស័យកីឡាបាល់ទាត់ ដែលកំពុងរកផលប៉ះពាល់ផ្នែកហិរញ្ញវិត្ថុ៕