តាមការផ្សាយរបស់ទីភ្នាក់ងារព័ត៌មាន Reuters គណៈកម្មាធិការរៀបចំបានស្នើសុំដល់សមាគមគិលានុបដ្ឋាយិកានៃប្រទេសជប៉ុន ក្នុងការជួយមើលការខុសត្រូវផ្នែកសុខាភិបាលលើបុគ្គលិកនៅទីតាំងប្រកួតអូឡាំពិក និងភូមិកីឡារបស់អត្តពលិកមុន និងអំឡុងព្រឹត្តិការណ៍ការប្រកួតថ្ងៃទី២៣ ខែកក្កដា ដល់ថ្ងៃទី ៨ ខែសីហា។
 

អ្នករៀបចំព្រឹត្តិការណ៍អូឡាំពិកបានបង្កើនការត្រៀមលក្ខណៈរបស់ពួកគេបែបនេះ ស្របពេលជប៉ុនព្យាយាមទប់ស្កាត់ការរីករាលដាលនៃជំងឺកូវីដ-១៩ កាន់តែខ្លាំងឡើងវិញ។ កាលពីចុងសប្តាហ៍មុនជប៉ុនបានប្រកាសតំបន់មួយចំនួនមានទីក្រុងតូក្យូ និងអូសាកាស្ថិតក្នុងស្ថានភាពអាសន្នផង។
 

ស្របពេលគ្នានេះ លោក Muto នាយកប្រតិបត្តិរៀបចំព្រឹត្តិការណ៍អូឡាំពិកតូក្យូឆ្នាំ ២០២០ បានប្រាប់សន្និសីទសារព័ត៌មានថា លោកបានស្នើសុំឱ្យមានគិលានុបដ្ឋាយិកាប្រហែលជា ៥០០ នាក់ ដើម្បីសម្រួលក្នុងកីឡាលំដាប់ពិភពលោកនេះ។ ការស្នើនេះ លោក Muto ផ្តោតសំខាន់លើបញ្ហាទាំងឡាយណាដែលជះឥទ្ធិពលផ្នែកសុខភាពក្នុងតំបន់ ដែលប៉ះពាល់លើអត្តពលិក មន្ត្រី និងអ្នកចូលរួមផ្សេងៗ។
 

គណៈកម្មាធិការរៀបចំក៏បានអះអាងដែរថា ខ្លួននឹងកោះប្រជុំជាមួយអ្នកជំនាញវេជ្ជសាស្ត្រនៅថ្ងៃទី៣០ ខែមេសានេះ ដើម្បីពិភាក្សាពីវិធានការណ៍នៃការទប់ស្កាត់កូវីដ-១៩ ដើម្បីរៀបចំការប្រកួតកីឡាអូឡាំពិកឱ្យដំណើរការដោយសុវត្ថិភាព៕