អ្នកចូលខេត្តបាត់ដំបង ត្រូវធ្វើតេស្តរកកូវីដ-១៩ បើសា្នក់នៅយូរត្រូវធ្វើចត្តាឡីស័កទៀត

COVID-19

ជាតិ

អ្នកចូលខេត្តបាត់ដំបង ត្រូវធ្វើតេស្តរកកូវីដ-១៩ បើសា្នក់នៅយូរត្រូវធ្វើចត្តាឡីស័កទៀត

27, Apr 2021 , 8:52 pm

រូបភាព

អាជ្ញាធរខេត្តបាត់ដំបង់ បានដាក់ទីតាំងត្រួតពិនិត្យការធ្វើដំណើរឆ្លងកាត់ចេញ ចូលក្នុងភូមិសាស្រ្តខេត្តបាត់ដំបង ចំនួន៨កន្លែង។ រូបភាព៖ហ្វេសប៊ុករដ្ឋបាលខេត្តបាត់ដំបង

ដោយ:

អាជ្ញាធរខេត្តបាត់ដំបង នឹងធ្វើតេស្តរកកូវីដ-១៩ និងដាក់ឱ្យធ្វើចត្តាឡីស័ក លើអ្នកដំណើរដែលវិលត្រឡប់ទៅរស់នៅ ឬស្នាក់នៅរយៈពេលវែង នៅក្នុងភូមិសាស្ត្រខេត្តនេះ។ ចំពោះអ្នកដំណើរដែលមានលិខិតបញ្ជាបេសកកម្មរបស់ស្ថាប័នសាធារណៈ ឬអ្នកដំណើរស្នាក់នៅតិចជាង១សប្តាហ៍ ក៏នឹងត្រូវយកសំណាកទៅវិភាគរហ័សរកជំងឺកូវីដ-១៩ដែរ។ នេះបើតាមខ្លឹមសារនៅក្នុងសេចក្តីណែនាំ ស្តីពីវិធានការបណ្តោះអាសន្ន ដើម្បីទប់ស្កាត់កូវីដ-១៩ របស់រដ្ឋបាលខេត្តនៅយប់ថ្ងៃទី២៧ មេសានេះ។

ក្រៅពីការរឹតបន្តឹង លើការធ្វើដំណើរចូលក្នុងភូមិសាស្ត្រខេត្តហើយ រដ្ឋបាលខេត្តក៏ដាក់ចេញនូវបម្រាម និងវិធានការការពារមួយចំនួនផងដែរ សម្រាប់ពលរដ្ឋ អាជីវករ អនុវត្ត នៅក្នុងសេចក្តីណែនាំបន្តអនុវត្តវិធានការរដ្ឋបាល នៅក្នុងភូមិសាស្ត្រខេត្តនេះ រហូតដល់ ១៣ឧសភា ឆ្នាំ២០២១។

រដ្ឋបាលខេត្តបានណែនាំឱ្យពលរដ្ឋទាំងអស់ អនុវត្តឱ្យបានខ្ជាប់ខ្ជួននូវវិធានការ ៣ការពារ និង៣កុំ ខណៈអាជីវករ ផ្សារទំនើប នឹងគ្រប់ទីកន្លែងលក់ទូទាំងអស់ មិនត្រូវបានអនុញ្ញាតឱ្យមានលក់គ្រឿងស្រវឹងឡើយ។ អាជ្ញាធរ ក៏មិនអនុញ្ញាឱ្យមានការជួបជុំសេពគ្រឿងស្រវឹងផងដែរ។ ចំពោះការជួបជុំការលេងកីឡា និងការជួបជុំផ្សេងៗក៏ត្រូវបន្តហាមឃាត់ រយៈពេល ២សប្តាហ៍ ទៀតដូចគ្នា គឺចាប់ពីថ្ងៃទី២៩ មេសា ដល់ថ្ងៃទី១៣ ឧសភា។

សម្រាប់ការលក់អាហារនៅតាមដងស្ទឹងសង្កែ ចាប់ពីស្ពានថ្មចាស់ ដល់ស្ពានថ្មី និងក្នុងផ្សាររាត្រី មិនត្រូវអនុញ្ញាតឱ្យភ្ញៀវបរិភោគនៅកន្លែងនោះទេ គឺអាចលក់បានសម្រាប់តែការ វេចខ្ចប់ប៉ុណ្ណោះ។ ដោយឡែកនៅតាមអាហារដ្ឋាន ភោជនីយដ្ឋាន កន្លែងលក់ភេសជ្ជៈ និងកន្លែងផ្សេងៗទៀតដែលត្រូវបានអនុញ្ញាតឱ្យលក់ដូរ ត្រូវតម្រូវឱ្យអតិថិជន ឬអ្នកចូលទៅកាន់ទីតាំងរបស់ខ្លួន ត្រូវពាក់ម៉ាស់ លាងសម្អាតដៃសម្លាប់មេរោគ និងរក្សាគម្លាតសុវត្ថិភាព។

សូមជម្រាបថាខេត្តបាត់ដំបង មានអ្នកជំងឺកូវីដ-១៩ ចំនួន ២នាក់ កំពុងព្យាបាលនៅមន្ទីរពេទ្យបង្អែកខេត្ត។ ដ្បិតតួលេខអ្នកឆ្លងមិនកម្រិតទាប ប៉ុន្តែដើម្បីទប់ស្កាត់កុំឱ្យជំងឺដ៏កាចសាហាវនេះរាតដ្បាតនៅក្នុងខេត្តរបស់ខ្លួន កន្លងមកលោក ងួន រតនៈ អភិបាលខេត្តបាត់ដំបង បានសម្រេចបិទផ្នែកខ្លះនៃផ្សារនានានៅក្នុងទីរួមខេត្ត រួមទាំងបិទផ្នែកខាងក្នុងផ្សារ មោងប្ញស្សីចាស់ ក្នុងស្រុកមោងឫស្សី រួមទាំងការបិទខ្ទប់ភូមិភូមិខ្នាចអំពរ ឃុំព្រែកជីក ស្រុករុក្ខគិរី ជាបណ្ដោះអាសន្នផងដែរ។

គិតមកដល់ពេលនេះ កម្ពុជាមានករណីកូវីដ-១៩ ចំនួន១១០៦៣នាក់ ក្នុងនោះអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មានចំនួន១០៥១៣ នាក់។ អ្នកសះស្បើយសរុបមាន៣ ៧០៤នាក់ ក្នុងនោះអ្នកស្លាប់សរុបឡើងដល់៨២នាក់។ បច្ចុប្បន្ន កម្ពុជាមានអ្នកជំងឺកូវីដ១៩ ចំនួន ៧២៧០នាក់ ក្នុងនោះ អ្នកជំងឺ ៣២៥៤នាក់ កំពុងរង់ចាំការបញ្ជូនទៅសម្រាកព្យាបាល, អ្នកជំងឺ១៤នាក់ សម្រាកព្យាបាលនៅផ្ទះ។ អ្នកជំងឺផ្សេងទៀត កំពុងសម្រាកព្យាបាលនៅតាមមន្ទីរពេទ្យ និងមណ្ឌលព្យាបាលនានា៕