COVID-19
ជាតិ
បិទភូមិឆ្នុកទ្រូ និងកំពង់ព្រះ ក្នុងស្រុកបរិបូណ៌ ២សប្តាហ៍ ក្រោយមនុស្ស៧នាក់ឆ្លងកូវីដ-១៩ កម្លាំងនគរបាលយាមកាមការធ្វើដំណើរចេញចូលរបស់ពលរដ្ឋនៅក្នុងភូមិស្ត្រឃុំឆ្នុកទ្រូ កាលពីយប់ថ្ងៃទី២៦មេសា។ រូបភាព៖ ហ្វេសប៊ុកលោក សេង ឌី នាយប៉ុស្ដ៍នគបាលឃុំឆ្នុកទ្រូ
×
ភ្នំពេញ៖ រដ្ឋបាលខេត្តកំពង់ឆ្នាំង បានសម្រេចបិទខ្ទប់ភូមិឆ្នុកទ្រូ និងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង រយៈពេល២សប្តាហ៍ បន្ទាប់ពីរកឃើញមនុស្ស ៧នាក់ ឆ្លងកូវី-១៩។ រដ្ឋបាលខេត្តកំពង់ឆ្នាំង បញ្ជាក់ថា ការបិទខ្ទប់នេះ គឺដើម្បីធានាដល់ប្រសិទ្ធភាពនៃការទប់ស្កាត់ជំងឺកូវីដ-១៩ និងទប់ស្កាត់មិនឲ្យរាលដាលទៅតំបន់ផ្សេងទៀត។ ហើយការបិទខ្ទប់ បណ្តោះអាសន្ននេះ ចាប់ផ្តើមពីថ្ងៃទី២៧ ដល់ថ្ងៃទី១០ ខែឧសភា ឆ្នាំ២០២១។
ក្នុងវិធានការបិទខ្ទប់នេះ ពលរដ្ឋមិនត្រូវបានអនុញ្ញាតឲ្យធ្វើដំណើរចេញ និងចូល ក្នុងភូមិឆ្នុក និងភូមិកំពង់ព្រះនោះទេ លើកលែងតែក្នុងករណីចាំបាច់ ដូចជាការធ្វើដំណើរទៅទិញគ្រឿងឧបភោគ បរិភោគ និងសម្ភារប្រើប្រាស់ប្រចាំថ្ងៃ។ មូលហេតុសុខភាពជាបន្ទាន់ ការទៅមណ្ឌលសុខភាពដើម្បីផ្តល់សំណាក ការធ្វើដំណើររបស់បុគ្គលិកពេទ្យរដ្ឋ និងឯកជន មន្ត្រីរាជការ ក្រុមពន្លត់អគ្គិភ័យ ក្រុមកម្លាំងប្រដាប់អាវុធ រួមទាំងមូលហេតុចាំបាច់ផ្សេងៗ នឹងត្រូវបានអនុញ្ញាតដោយអាជ្ញាធរមានសមត្ថកិច្ច។ នេះបើតាមតាមសេចក្តីប្រាសរបស់រដ្ឋបាលខេត្តកំពង់ឆ្នាំង។
ការជួបជុំ ឬការប្រមូលផ្តុំមនុស្សក៏ត្រូវបានហាមឃាត់ដែរ លើកលែងតែករណីជួបជុំចំណោមសមាជិកគ្រួសារ ការជួបជុំរបស់បុគ្គលិកសុខាភិបាល ក្រុមសមត្ថកិច្ច និងមនុស្សដែលមានការចាំបាច់ក្នុងការបម្រើផលប្រយោជន៍សាធារណៈជន។ ចំណែកការរៀបចំពិធីបុណ្យសព ត្រូវគោរពតាមការកំណត់អាជ្ញារធរមានសមត្ថកិច្ច។
សូមបញ្ជាក់ថា កម្ពុជាបានរកឃើញអ្នកវិជ្ជមាន ១១០៦៣នាក់ ក្នុងនោះអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មានចំនួន១០៥១៣ នាក់។ អ្នកសះស្បើយសរុបមាន៣ ៧០៤នាក់ ក្នុងនោះអ្នកស្លាប់សរុបឡើងដល់៨២នាក់។ បច្ចុប្បន្ន កម្ពុជាមានអ្នកជំងឺកូវីដ១៩ ចំនួន ៧២៧០នាក់ ក្នុងនោះ អ្នកជំងឺ ៣២៥៤នាក់ កំពុងរង់ចាំការបញ្ជូនទៅសម្រាកព្យាបាល, អ្នកជំងឺ១៤នាក់ សម្រាកព្យាបាលនៅផ្ទះ។ អ្នកជំងឺផ្សេងទៀត កំពុងសម្រាកព្យាបាលនៅតាមមន្ទីរពេទ្យ និងមណ្ឌលព្យាបាលនានា៕
Tag:
Thmeythmey
កូវីដ-១៩
ឆ្នុកទ្រូ
កំពង់ព្រះ
កំពង់ឆ្នាំង
© រក្សាសិទ្ធិដោយ thmeythmey.com