តាមរយៈសុន្ទកថាទៅកាន់សភាអាមេរិក លោកប្រធានាធិបតីបានលើកឡើងពីបញ្ហាជាច្រើនដូចជា កូវីដ-១៩ ការងើបឡើងនៃសេដ្ឋកិច្ចអាមេរិក និងបញ្ហាផ្សេងទៀត។ ក្នុងនោះ លោក បៃឌិន ក៏បានលើកឡើងពីការប្រកួតប្រជែងរវាងចិន និងអាមេរិកផងដែរ។ 

 

«អាមេរិក ស្វាគមន៍ការប្រកួតប្រជែងជាមួយចិន»។ ប្រធានាធិបតីអាមេរិក បានលើកឡើងច្បាស់ៗបែបនេះទៅកាន់សមាជិកសភាអាមេរិក។ ក្នុងន័យនេះ ក្រុងវ៉ាស៊ីនតោនមិនមែនចង់រករឿង ឬចង់បង្ករឿងជាមួយក្រុងប៉េកាំងឡើយ។ ជាមួយគ្នានេះ លោក បៃឌិន បានបន្តថា អាមេរិក នឹងប្រឆាំងជាមួយការអនុវត្តប្រព័ន្ធពាណិជ្ជកម្មមិនយុត្តិធម៌ ដែលបន្ទាបតម្លៃពលកម្មកម្មករ និងឧស្សាហកម្មអាមេរិក  តាមរយៈការលួចបច្ចេកវិទ្យាអាមេរិក និងកម្មសិទ្ធិបញ្ញា។ 

 

ក្នុងសុន្ទរកថាដដែលនេះ លោក បៃឌិន ក៏បានផ្តាំទៅប្រធានាធិបតីចិន ស៊ី ជិនភីងផងដែរថា អាមេរិក នឹងបន្តរក្សាវត្តមានកងទ័ពដ៏ខ្លាំងរបស់ខ្លួននៅក្នុងតំបន់ឥណ្ឌូ-បាស៊ីហ្វិក ដូចអ្វីដែលអាមេរិក បានធ្វើរៀបចំបក្សសម្ព័ន្ធណាតូ (NATO) នៅអឺរ៉ុប ដើម្បីទប់រុស្ស៊ីដែរ។ បើតាមប្រធានាធិបតីអាមេរិក ការរក្សាកម្លាំងទ័ពអាមេរិកបែបនេះ គឺជាការពារផលប្រយោជន៍របស់ខ្លួននៅក្នុងតំបន់នោះ។ 

 

លើសពីនេះ ប្រធានាធិបតីអាមេរិកវ័យ ៧៨ឆ្នាំរូបនេះ ក៏បានចង្អុលបង្ហាញពីគោលដៅរបស់លោក ស៊ី ដែលជាប្រធានាធិបតីចិនផងដែរ។ «គាត់ពិតជាចង់ក្លាយជាមនុស្សសំខាន់បំផុត និងប្រទេសដ៏ពិសេសមួយនៅលើពិភពលោក»។ លោកបៃឌិន បានបញ្ជាក់បែបនេះ។ 

 

ក្រៅពីបញ្ហាទំនាក់ទំនងជាមួយចិន លោកបៃឌិនថែមទាំងលើកឡើងពីលទ្ធិប្រជាធិបតេយ្យ និងការគ្រប់គ្រងបែបផ្តាច់ការផងដែរ។ បើតាមលោកប្រធានាធិបតី ការគ្រប់គ្រងបែបផ្តាច់ការនឹងមិនឈ្នះឡើយនៅពេលអានាគត ប៉ុន្តែអាមេរិក ដែលប្រកាន់លទ្ធិប្រជាធិបតេយ្យទៅវិញទេ ដែលជាអ្នកឈ្នះ។ ការលើកឡើងបែបនេះ ទំនងជាឌឺដងដាក់ចិន និងរុស្ស៊ី៕