លោក ទិន ប៊ុនលី នាយករដ្ឋបាលខេត្តប៉ៃលិន បានបញ្ជាក់ថា លោកស្រី បាន ស្រីមុំ បានសម្រេចផ្អាកអាជីវកម្មក្រុមហ៊ុនដឹកជញ្ជូន វីរៈប៊ុនថាំ ដោយតម្រូវឲ្យម្ចាស់អាជីវកម្ម សហការ និងអនុវត្តតាមវិធានការណែនាំរបស់រដ្ឋបាលខេត្តជាចាំបាច់។
 

ថ្លែងប្រាប់សារព័ត៌មានថ្មីៗ តាមទូរសព្ទលោក ប៊ុនលី បានបន្ថែមថា ក្នុងអំឡុងពេលនៃការផ្អាកអាជីវកម្មបណ្ដោះអាសន្ននេះ  បុគ្គលិកដែលបម្រើការងារនៅក្នុងក្រុមហ៊ុន វីរៈប៊ុនថាំទាំង៣សាខា ត្រូវហាមឃាត់ការធ្វើដំណើរចេញ-ចូលទីតាំងអាជីវកម្មក្រុមហ៊ុន និងត្រូវធ្វើចត្តាឡីស័ក១៤ថ្ងៃ តាមវិធានការសុខាភិបាល។ 
 

បើតាមលោក ប៊ុនលី រាល់អ្នកធ្វើដំណើរចូលខេត្តប៉ៃលិន ដែលមានប្រវត្តិឆ្លងកាត់បណ្ដារាជធានី-ខេត្ត ឬតំបន់ណា ដែលកំពុងឆ្លងរាលដាលកូវីដ-១៩ គឺអាជ្ញាធរតម្រូវឲ្យធ្វើតេស្តទាំងអស់ ដើម្បីធានាសុវត្ថិភាព និងទប់ស្កាត់ការរាលដាល។ 
 

គិតមកដល់ពេលនេះ កម្ពុជាមានអ្នកឆ្លងកូវីដជាង១,៤ម៉ឺននាក់ ខណៈអ្នកជាសះស្បើយជាង៥ពាន់នាក់ និងមានអ្នកស្លាប់ជាង១០៦នាក់៕