ការផ្ដល់ការអនុញ្ញាតរបស់ទីភ្នាក់ងារចំណីអាហារ និងឱសថ (FDA) អាចធ្វើឡើងនៅសប្ដាហ៍ក្រោយ ឬលឿនជាងនេះ។ បើតាមការចុះផ្សាយរបស់ទីភ្នាក់ងារព័ត៌មាន AP នៅថ្ងៃទី៥ ខែឧសភា ក្រុមហ៊ុនឱសថ Pfizer បានរកឃើញពីប្រសិទ្ធភាពវ៉ាក់សាំងរបស់ខ្លួនលើក្រុមមនុស្សពី១២ទៅ១៦ឆ្នាំក្នុងការសាកល្បងកន្លងមក ហើយស្នើសុំការពីអនុញ្ញាតពី FDA តែម្ដង។
 

យ៉ាងណាមិញ  FDA ត្រូវរង់ចាំយោបល់គណៈកម្មាធិការប្រឹក្សាវ៉ាក់សាំងសហព័ន្ធសិន មុនសម្រេចចិត្តផ្ដល់ការអនុញ្ញាត។ ការចាក់វ៉ាក់សាំងបង្ការកូវីដ-១៩ អាចចាប់ផ្ដើមទៅបាន ក្រោយពីមជ្ឈមណ្ឌលគ្រប់គ្រង និងបង្ការជំងឺឆ្លង (CDC) ទទួលយកអនុសាសន៍របស់គណៈកម្មាធិការនេះ។ នីតិវិធីសម្រេចទាំងនេះ អាចត្រូវបញ្ចប់នៅប៉ុន្មានថ្ងៃខាងមុខ។
 

ក្នុងលទ្ធផលសាកល្បងដែលចេញកាលពីចុងខែមីនា ក្រុមហ៊ុន Pfizer បានសិក្សាប្រសិទ្ធភាពវ៉ាក់សាំងលើអ្នកស្ម័គ្រចិត្តចំនួន២២៦០នាក់ដែលមានអាយុចន្លោះ១២ដល់១៥ឆ្នាំ។ លទ្ធផលបង្ហាញថា មិនមានករណីវិជ្ជមានកូវីដ-១៩ ក្នុងចំណោមមនុស្សវ័យជំទង់ដែលបានទទួលវ៉ាក់សាំងទាំងពីរដូសឡើយ។ កន្លងមក វ៉ាក់សាំងក្រុមហ៊ុន Pfizer ទទួលបានការអនុញ្ញាតឱ្យចាក់លើមនុស្សអាយុពី១៦ឆ្នាំឡើងប៉ុណ្ណោះ។
 

វ៉ាក់សាំងរបស់ Pfizer រួមចំណែកសំខាន់ក្នុងយុទ្ធនាការផ្ដល់វ៉ាក់សាំងរបស់រដ្ឋបាលប្រធានាធិបតី ចូ បៃឌិន ។ វ៉ាក់សាំងរបស់ក្រុមហ៊ុននេះច្រើនជាង១៣១លានដូស ត្រូវបានចាក់ឱ្យប្រជាជនអាមេរិក។ អាមេរិក បានបញ្ជាទិញវ៉ាក់សាំង Pfizer ប្រមាណ៣០០លានដូសសម្រាប់មនុស្ស១៥០លាននាក់ ដែលនឹងត្រូវដឹកជញ្ជូនត្រឹមចុងខែកក្កដាខាងមុខ៕