COVID-19
ជាតិ
កម្មកររោងចក្រ៤នាក់ទៀត ក្នុងស្រុកបាទី វិជ្ជមានកូវីដ-១៩ រូបភាព៖ហ្វេសប៊ុករដ្ឋបាលស្រុកបាទី ខេត្តតាកែវ
× ភ្នំពេញ៖ កម្មកររោងចក្រភីវី ដែលស្ថិតក្នុងភូមិសាស្ត្រស្រុកបាទី ខេត្តតាកែវ ចំនួន៤នាក់បន្ថែមទៀត មានតេស្តវិជ្ជមានកូវីដ-១៩។ នេះបើតាមសេចក្តីជូនដំណឹងរបស់រដ្ឋបាលស្រុកបាទី នៅថ្ងៃទី៤ ខែឧសភានេះ។
រដ្ឋបាលខេត្តតាកែវ ក៏បានបង្ហាញអត្តសញ្ញាណអ្នកវិជ្ជមានទាំង៤នាក់ដែរ ដែលក្នុងនោះមានស្ត្រីវ័យ២១ឆ្នាំ ឈ្មោះខាត់ ស្រីពីន រស់នៅភូមិត្រពាំងឫស្សី ឃុំពត់សរ ស្រុកបាទី។ បុរសវ័យ៣១ឆ្នាំ ឈ្មោះឈឹន វណ្ណី រស់នៅភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្ដាល។ ស្ត្រីវ័យ៣១ឆ្នាំ ឈ្មោះ ញ៉ាន់ ណាក់ រស់នៅ ភូមិឃ្លាំងសម្បត្តិ ឃុំពត់សរ ស្រុកបាទី និងស្ត្រីវ័យ២៤ឆ្នាំ ឈ្មោះផុន ដាណេ រស់នៅភូមិខ្វាន់មាស ឃុំពត់សរ ស្រុកបាទី។
ទាក់ទងនឹងចំនួនអ្នកវិជ្ជមានកូវីដ-១៩ សរុបនៅក្នុងស្រុកបាទីនេះ លោក ភួន ឈីម អភិបាលស្រុកបាទី បានថ្លែងប្រាប់សារព័ត៌មានThmeythmey តាមទូរសព្ទថា តួលេខបឋមត្រឹមថ្ងៃទី៤ឧសភា មានចំនួន៤៨នាក់ ខណៈខេត្តតាកែវទាំងមូល មានអ្នកឆ្លងសរុប ១២៧នាក់ ក្នុងនោះ២៩នាក់ បានជាសះស្បើយ។
ដោយសារកំណើនអ្នកឆ្លងច្រើន ខណៈអ្នកពាក់ព័ន្ធត្រូវដាក់ខ្លួនឱ្យនៅដាច់ដោយឡែកក៏កើនដល់ជាង២ពាន់នាក់នោះ រដ្ឋបាលស្រុកបាទី បានរៀបចំបង្កើនមណ្ឌលចត្តាឡីស័ក ដល់ទៅ១៦ទីតាំង នៅតាមឃុំនានាក្នុងស្រុកបាទី។ តាមអភិបាលស្រុក ក្នុងឃុំនីមួយៗ អាចមានមណ្ឌលចត្តាឡីស័ក ១ ឬ ២ឡើង ទៅដើម្បីត្រៀមឱ្យអ្នកពាក់ព័ន្ធនឹងជំងឺកូវីដ-១៩ ធ្វើចត្តាឡីស័ក៕
Tag:
កូវីដ-១៩
ស្រុកបាទី
តាកែវ
កម្មករ
កម្មការនី
© រក្សាសិទ្ធិដោយ thmeythmey.com