អនុគណៈកម្មការស្រាវជ្រាវជំងឺកូវីដ-១៩ បានបញ្ជាក់ពីមូលហេតុដែលលោក កក្កដា សោភ័ណ្ឌ គ្មានល្មើសវិធានការសុខាភិបាលថា  កាលពីថ្ងៃទី៩ ខែមីនា លោក សោភ័ណ្ឌ មានអាការមិនស្រួលខ្លួន ប៉ុន្តែលោកមិនចាកចេញពីផ្ទះរបស់លោកឡើយ។

 

រំលងបាន១ថ្ងៃគឺថ្ងៃទី១២ ខែមីនា លោក កក្កដា សោភ័ណ្ឌ បានទៅចូលរួមមង្គលការនៅខេត្តតាកែវ ប៉ុន្តែលោកបានចូលរួមតែមួយព្រឹកប៉ុណ្ណោះ ដោយសារសង្ស័យអាការរបស់ខ្លួន ពោលគឺនៅពេលរសៀលថ្ងៃដដែលនោះ លោកត្រឡប់មកភ្នំពេញវិញ ដើម្បីទៅមន្ទីរពេទ្យមិត្តភាពខ្មែរសូវៀត យកសំណាកពិនិត្យរកកូវីដ-១៩។ ក្រោយពីយកសំណាករួចលោក បានត្រឡប់មកផ្ទះវិញ ដោយជួលម៉ូតូកង់បីជិះ។ 

 

ក្រោយពីយកសំណាករួច នៅថ្ងៃទី១៣ ខែមីនា លោក បានធ្វើចត្តាឡីស័កនៅផ្ទះ។ បន្ទាប់មកនៅថ្ងៃទី១៤ លោកបានទទួលលទ្ធផលថា វិជ្ជមានកូវីដ-១៩។ នៅថ្ងៃនោះដែរគឺលោកត្រូវបានពេទ្យបញ្ជូនមកព្យាបាលនៅមណ្ទលសុខភាពចាក់អង្រែ។ 

 

«ផ្អែកលើលទ្ធផលស្រាវជ្រាវ និងការផ្ទៀងផ្ទាត់ ខាងលើនេះ ឈ្មោះ កក្កដា សោភ័ណ្ឌ ពុំបានល្មើសនឹងវិធានសុខាភិបាលទេ គឹគ្រាន់តែជាអំពើធ្វេសប្រហែស មិនគោរពតាមការណែនាំរបស់ក្រសួងសុខាភិបាល លើកការពាក់ម៉ាស់ និងរក្សាគម្លាតតែប៉ុណ្ណោះ»។ នេះជាការលើកឡើងរបស់អនុគណៈកម្មការស្រាវជ្រាវជំងឺកូវីដ-១៩។ 

 

គិតមកដល់ពេលនេះ កម្ពុជាមានអ្នកជំងឺកូវីដ-១៩ ចំនួន ១៦៩៧១ ករណី ក្នុងនោះអ្នកជាសះស្បើយ សរុប ៦០១៩នាក់ និងស្លាប់១១០នាក់៕