បើតាមរបាយការណ៍ដែលសារព័ត៌មានថ្មីៗទទួលបានរោងចក្រម៉ាស់ចំនួន២ និងរោងចក្រផលិតអាវពេទ្យចំនួន៥ បានបើកថ្មី ដែលមានប្រភពវិនិយោគពីជនជាតិចិនចំនួន៦ក្រុមហ៊ុន ហើយមួយក្រុមហ៊ុន ជារបស់អាមេរិក។ ម៉ាស់ និងអាវពេទ្យទាំងនេះគឺនាំចេញទៅចិន ជប៉ុន អាមេរិក និងបណ្ដាប្រទេសនៅអឺរ៉ុប។ ជាមួយគ្នាដែរសិប្បកម្មផលិតម៉ាស់ចំនួន៧ ក៏បានបង្កើតឡើងថ្មីដែរ ក្នុងខែមេសា។សិប្បកម្មម៉ាស់ទាំង៧នេះ មានប្រភពវិនិយោគពីជនជាតិចិនចំនួន៥ ហើយសិប្បកម្ម ខ្មែរមានចំនួនចំនួន២។ 

 

រោងចក្រនិងសិប្បកម្មទាំង១៤ទីតាំងនេះស្ថិតនៅក្នុងរាជធានីភ្នំពេញ ខេត្តព្រះសីហនុ ខេត្តតាកែវ ខេត្តកំពុងចាមនិងខេត្តកណ្ដាល។ រោងចក្រនិងសិប្បកម្មបើកថ្មីនេះ គឺមានសមត្ថភាពផលិតម៉ាស់ និងអាវមានបានជាង១៦០លានទៅ២៦០លានម៉ាស់ និងអាវ ក្នុងរយៈពេលមួយខែ។ សម្រាប់វត្ថុជាដើមក្នុងការផលិត រោងចក្រសិប្បកម្មទាំងនេះគឺនាំចូលពីប្រទេសចិន ហើយក្នុងនោះ មានរោងចក្រតែពីរប៉ុណ្ណោះ ដែលនាំចូលវត្ថុធាតុដើមបន្ថែមពីប្រទេសឥណ្ឌានិងម៉ាឡេស៊ី។ 
 

ទោះបីមានការយាយីពីកូវីដ-១៩យ៉ាងណាក៏ដោយចំនួនរោងចក្រផលិតម៉ាស់ និងអាវពេទ្យនៅតែមានចំនួនកើនឡើង គួរឲ្យកត់សម្គាល់។ការបង្កើតថ្មីនេះ គឺអាចបង្កើតកន្លែងការងារដល់ពលរដ្ឋកម្ពុជា ជិត១ពាន់កន្លែងផងដែរ៕