COVID-19
ជាតិ
មនុស្ស៤នាក់ទៀតវិជ្ជមានកូវីដ-១៩ នៅសៀមរាប គឺជាអ្នកដំណើរពីភ្នំពេញ និងកណ្តាល
× រដ្ឋបាលខេត្តសៀមរាប បានប្រកាសរកឃើញមនុស្សចំនួន ៤នាក់បន្ថែមទៀត មានវិជ្ជមានកូវីដ-១៩ នៅថ្ងៃទី៨ ខែឧសភា ឆ្នាំ២០២១នេះ។ តាមសេចក្តីប្រកាសព័ត៌មានរបស់រដ្ឋបាលខេត្តសៀមរាប ក្នុងចំណោមនោះមានមនុស្ស៣នាក់ ជាអ្នកដំណើរពីរាជធានីភ្នំពេញ ខណៈម្នាក់តៀតជាអ្នកដំណើរពីស្រុកពញាឮ ខេត្តកណ្តាល។
មនុស្ស៤នាក់ ត្រូវបានរកឃើញថាមានវិជ្ជមានកូវីដ-១៩ នៅខេត្តសៀមរាប នៅថ្ងៃទី៨ ឧសភានេះ ដែលសុទ្ធតែជាអ្នកដំណើរពីរាជធានីភ្នំពេញ និងខេត្តកណ្តាល។ បើតាមសេចក្តីប្រកាសព័ត៌មានរបស់រដ្ឋបាលខេត្តអ្នកវិជ្ជមានទាំង៤នាក់នោះ គឺជាបុរសឈ្មោះ អិ សារ៉ា វ័យ៣៣ឆ្នាំ មានអាសយដ្ឋាននៅភូមិគោកដឿ ឃុំកៀនសង្កែ ស្រុកសូទ្រនិគម ធ្វើដំណើរមកពីរាជធានីភ្នំពេញ។ បុរសឈ្មោះ ទឹម គឹមទន់ អាយុ២៨ឆ្នាំ មានអាសយដ្ឋាននៅភូមិត្រពាំងត្រាវ ឃុំគោកធ្លកក្រោម ស្រុកជីក្រែង ធ្វើដំណើរមកពីរាជធានីភ្នំពេញ។ បុរសឈ្មោះ ទិត ឡូ អាយុ២៨ឆ្នាំ មានអាសយដ្ឋាននៅភូមិថ្នល់បណ្តោយ ឃុំព្រះដាក់ ស្រុកបន្ទាយស្រី ធ្វើដំណើរមកពីសង្កាត់កំបូល ខណ្ឌកំបូល រាជធានីភ្នំពេញ និងត្រូវជាមិត្តរបស់ រូន រាន់ ដែលវិជ្ជមានកូវីដ-១៩ កាលពីថ្ងៃទី៧ ខែឧសភា ឆ្នាំ២០២១។ ស្ត្រីម្នាក់ទៀតអាយុ៣១ឆ្នាំ ឈ្មោះ ញាន លេ មានអាសយដ្ឋាននៅភូមិល្វា ឃុំល្វា ស្រុកពួក ធ្វើដំណើរមកពីស្រុកពញាឮ ខេត្តកណ្តាល។
រដ្ឋបាលខេត្តសៀមរាបបញ្ជាក់ទៀតថាអ្នកវិជ្ជមានថ្មីទាំង៤នាក់ត្រូវបាន អាជ្ញាធរដែលប្រចាំការនៅ ព្រំប្រទល់ខេត្តសៀមរាប-ខេត្តកំពង់ធំ ចំណុចស្រុកជីក្រែង និងស្រុកស្ទោង ពិនិត្យសុខភាពបឋម និងសន្និដ្ឋានថាជាករណីសង្ស័យ ក៏បានបញ្ជូនមកយកសំណាកធ្វើតេស្តរកកូវីដ-១៩។
ក្រៅពីរកឃើញអ្នកវិជ្ជមានបន្ថែម ក្រុមគ្រូពេទ្យនៃមន្ទីរពេទ្យបង្អែកខេត្តសៀមរាប ក៏បានព្យាបាលអ្នកជំងឺកូវីដ-១៩ ចំនួន៣នាក់ ឱ្យជាសះស្បើយដែរ។ អ្នកទាំង៣នាក់នោះមាន បុរសឈ្មោះ អូន អ៊ន អាយុ៣៨ឆ្នាំ មានអាសយដ្ឋាននៅភូមិចំការខាងជើង ឃុំស្វាយជ្រុំ ស្រុកមេសាង ខេត្តសព្រៃវែង។ បុរសឈ្មោះ ហួត រតនៈវត្ថុ អាយុ៣៨ឆ្នាំ មានអាសយដ្ឋាននៅភូមិតាវៀន សង្កាត់សាលាកំរើក ក្រុងសៀមរាប និងបុរសឈ្មោះ ឡៃ ដារី អាយុ៣២ឆ្នាំ ដែលមានអាសយដ្ឋាននៅភូមិវត្តបូព៌ សង្កាត់សាលាកំរើក ក្រុងសៀមរាប។
មកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន៦៨នាក់ បានព្យាបាលជាសះស្បើយចំនួន២០នាក់ ស្លាប់១នាក់ និង៤៧នាក់ទៀត កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប៕
© រក្សាសិទ្ធិដោយ thmeythmey.com