COVID-19
ជាតិ
ស្ត្រីដែលសម្រាលកូនក្នុងបន្ទប់ជួល ត្រូវបានជួយសង្គ្រោះទាំងម្តាយ និងកូន
× ភ្នំពេញ៖ស្ត្រីដែលសម្រាលកូនក្នុងបន្ទប់ជួល ផុតគ្រោះថ្នាក់ហើយទាំងម្តាយ និងកូន បន្ទាប់ពីការជួយជ្រោមជ្រែងពីញាតិជិតខាង ដោយការដឹកតាមរ៉ឺម៉កកង់បី ទៅកាន់មណ្ឌលសុខភាពស្ទឹងមានជ័យទាំងយប់នោះ។ ដោយសារស្ត្រីជាម្តាយមានសុខភាពខ្សោយ ក្រោយសម្រាល និងដោយមានជំងឺប្រចាំកាយស្រាប់ ក៏ត្រូវបានបញ្ជូនបន្តទៅកាន់មន្ទីរសុខាភិបាលរាជធានីភ្នំពេញ ឬពេទ្យសម្ភពក្រុង។
វីដេអូផ្សាយផ្ទាល់តាមហ្វេសប៊ុក រយៈពេលជាងកន្លះម៉ោង កាលពីយប់ថ្ងៃទី៨ ឧសភា អំពីស្ត្រីម្នាក់ដែលបានសំងំសម្រាលកូននៅក្នុងបន្ទប់ជួល ត្រូវបានអ្នកប្រើប្រាស់បណ្តាញសង្គមមួយនេះ ចែករំលែកជាង១៧ម៉ឺនដងឯណោះ។ ហេតុការណ៍នេះ កើតឡើងនៅម៉ោងជិត៧ យប់ នៅបន្ទប់ជួលមួយកន្លែង នៅក្នុងភូមិថ្មី សង្កាត់ស្ទឹងមានជ័យ១ ខណ្ឌមានជ័យ ដែលបច្ចុប្បន្ន គឺជាតំបន់លឿងទុំ។
តាមរយៈតាមវីដេផ្សាយផ្ទាល់នោះ ស្ត្រីរូបនេះបានសម្រាលកូនហើយ ប្រហែលកន្លះម៉ោងទៅហើយ ប៉ុន្តែទងផ្ចិតទារកមិនទាន់របូតចេញពីផ្ទៃនៅឡើយ។ ដូច្នេះហើយទើបអ្នកស្រីស៊ឺន ទូច ត្រូវជាម្តាយរបស់ស្ត្រីដែលទើបសម្រាលកូនរូបនេះ ឆោឡោឡើង និងដឹងទៅដល់អ្នកជិតខាង។ មួយសន្ទុះមក ស្ត្រីរូបនេះ និងទារកដែលទងផ្ចិតនៅជាប់នឹងផ្ទៃម្តាយនៅឡើយ ត្រូវបានអ្នកជិតខាង បីដាក់លើកង់បីដឹកទៅមណ្ឌលសុខភាពខណ្ឌមានជ័យ ហើយត្រូវបានពេទ្យជំនាញសង្គ្រោះបន្តតាមបច្ចេកទេស ឱ្យផុតពីគ្រោះថ្នាក់។ យ៉ាងណាក៏ដោយ ដោយសារតែ ម្តាយដែលទើបសម្រាល មានអាការអាការថប់ដង្ហើមខ្លាំង ឈឺក្បាល និងចង់ក្អួត ដោយសារមានជំងឺប្រចាំកាយស្រាប់ផងនោះ ក៏ត្រូវបានបញ្ជូនបន្តទៅសម្រាកនៅ មន្ទីរពេទ្យបង្អែករាជធានីភ្នំពេញ។
អ្នកស្រី ស៊ឺន ទូច បានប្រាប់សារព័ត៌មាន Thmeythmey តាមទូរសព្ទថា កូនស្រីគាត់ ដែលសម្រាលកូននៅក្នុងបន្ទប់ជួលនោះ ឈ្មោះ ញៀន ចាន់វីណា អាយុ១៧ឆ្នាំ។ តាមអ្នកស្រី ស៊ឺន ទូច កូនស្រីរបស់ខ្លួននេះ ក៏មានកូនស្រីម្នាក់ទៀតដែលទើបមានអាយុ១០ខែប៉ុណ្ណោះ មុននឹងសម្រាលកូនទី២នេះ។ មិនតែប៉ុណ្ណោះ អ្នកម្តាយវ័យ១៧ឆ្នាំរូបនេះ ក៏មានជំងឺបេះដូងចំហ ប្រចាំកាយផងដែរ។
អ្នកស្រី ស៊ឺន ទូច ដែលនៅកំដរកូនស្រី និងចៅទើបនឹងកើតនៅមន្ទីរពេទ្យបង្អែករាជធានីភ្នំពេញនោះ បានរៀបរាប់ប្រាប់សារព័ត៌មាន Thmeythmey ទៀតថា ក្រោយពីមានការយកចិត្តទុកដាក់ពីក្រុមគ្រូពេទ្យ នៃមន្ទីរពេទ្យសម្ភពក្រុង កូនស្រីរបស់អ្នកស្រី ដែលទើបតែសម្រាកកូនខ្ចីបានតែប៉ុន្មានម៉ោងនោះ ក៏បានធូរស្រាលវិញ ៖«ពេទ្យគាត់យកចិត្តទុកដាក់ គាត់បានដាក់ខ្យល់អុកស៊ីសែនឱ្យកូនខ្ញុំ។ គាត់លើកទឹកចិត្តខ្ញុំកុំឱ្យភ័យ ហើយកុំឱ្យកូនខ្ញុំភ័យ។ ពេលនេះកូនខ្ញុំបានធូរហើយ គ្រាន់តែនៅស្លេក ពេទ្យថា ត្រូវនៅតាមដានអាការសិន»។ នេះជាការរៀបរាប់របស់អ្នកស្រី ស៊ឺន ទូច ដែលមានអាយុ ៤៣ឆ្នាំ រួចបញ្ជាក់បន្តពីស្ថានភាពជីវភាពរបស់ខ្លួន ថាខ្លួនមាន របរលក់ម្ជូរ និងដើររើសអេតចាយ ហើយចាប់តាំងពីផ្ទុះជំងឺកូវីដ-១៩ ជាពិសេសក្នុងអំឡុងបិទខ្ទប់រាជធានីភ្នំពេញ អ្នកស្រី ព្រមទាំងកូនស្រី បាត់បង់ចំណូលទាំងស្រុង។ ការដោះស្រាយជីវភាពប្រចាំថ្ងៃ មានជំនួយឧបត្ថម្ភពីរដ្ឋាភិបាលខ្លះ ពីញាតិមិត្ត នៅក្បែរផ្ទះជួលនោះខ្លះ៕
Tag:
ស្ត្រី
ពពោះ
សម្រាលកូន
© រក្សាសិទ្ធិដោយ thmeythmey.com