ពលរដ្ឋស្ថិតនៅតំបន់ក្រហម មិនត្រូវបានអនុញ្ញាតឱ្យចេញពីលំនៅឋាន ឬទីស្នាក់នៅបច្ចុប្បន្នឡើយ ហើយសកម្មភាពកីឡា នៅខាងក្រៅលំនៅឋាន ឬទីសំណាក់ ក៏ត្រូវបានហាមឃាត់ដែរ។ នេះបើតាមសេចក្តីសម្រេចរបស់រដ្ឋបាលខេត្តបន្ទាយមានជ័យ ដែលបន្តទៀតថាការធ្វើដំណើរទៅជួបមន្ត្រីសុខាភិបាលដើម្បីយកសំណាកតេស្តរកកូវីដ-១៩ និងការធ្វើដំណើរទៅចាក់វ៉ាក់សាំងកូវីដ-១៩ ត្រូវបានអនុញ្ញាត។ 

 

រដ្ឋបាលខេត្តបន្ទាយមានជ័យ ក៏បានតម្រូវឱ្យផ្សារ និងទីកន្លែងលក់ម្ហូបអាហារ គ្រឿងឧបភោគបរិភោគ ព្រមទាំងសកម្មភាពមុខរបរ និងអាជីវកម្មទាំងអស់ ត្រូវផ្អាកបណ្តោះអាសន្នផងដែរ លើកលែងតែសេវាពន្លត់អគ្គិភ័យ ទឹកស្អាត សេវាសង្គ្រោះបន្ទាន់ សេវាសុខភិបាល ឱសថស្ថាន និងសេវាផ្គត់ផ្គង់បរិក្ខាពេទ្យ ព្រមទាំងទីតាំងផលិត និងផ្គត់ផ្គង់អាល់កុល និងអុកស៊ីសែន។

បន្ថែមពីនេះ សេវាផ្គត់ផ្គង់ស្បៀងរបស់រដ្ឋ សេវាសង្គ្រោះបន្ទាន់ ការដឹកជញ្ជូនសំរាម និងសំណល់រឹង នៅតំបន់ក្រហម ក៏ត្រូវបាលលើកលែងដែរ។ ជាមួយគ្នានេះដែរ អាជ្ញាធរ ក៏អនុញ្ញាតចំពោះការធ្វើដំណើរបស់មន្ត្រីរាជការ កងកម្លាំងប្រដាប់អាវុធដែលត្រូវអនុវត្តវិធានការនានាក្នុងអំឡុងពេលបិទខ្ទប់ ដោយភ្ជាប់នូវលិខិតបញ្ជាបេសកកម្ម៕