រដ្ឋបាលខេត្តបន្ទាយមានជ័យ បានជូនដំណឹងពីការស្លាប់បុរសវ័យ ៥០ឆ្នាំម្នាក់ ដោយកូវីដ-១៩ ដែលជាអាជីវករ ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

 

តាមសេចក្ដីជូនដំណឹងនៅរសៀលថ្ងៃទី១០ឧសភានេះ មុនពេលស្លាប់ បុរសរូបនេះ មានអាការក្ដៅខ្លួន អស់កម្លាំង និងជំងឺសម្ពាធឈាម និងបានសម្រាកព្យាបាលជំងឺនៅបន្ទប់ពិគ្រោះជំងឺពីរកន្លែងផ្សេងគ្នា ក្នុងក្រុងប៉ោយប៉ែត មុនពេលតេស្តរកឃើញវិជ្ជមានកូវីដ-១៩ នៅថ្ងៃទី០៨ឧសភា នៅមន្ទីរពេទ្យបង្អែកក្រុងប៉ោយប៉ែត។ ក្រោយសម្រាកព្យាបាលមួយយប់ អាជីវកររូបនេះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពកម្ពុជា-ជប៉ុនមង្គលបុរី ហើយស្លាប់នៅថ្ងៃទី ១០ឧសភា។ 
 

ពាក់ព័ន្ធនឹងករណីខាងលើនេះ អាជ្ញាធរកំពុងធ្វើការស្រាវជ្រាវ និងអំពាវនាវដល់អ្នកប៉ះពាល់ផ្ទាល់ និងប្រយោលជាមួយអ្នកជំងឺខាងលើនេះ ត្រូវប្រញាប់តេស្តសំណាក និងធ្វើចត្តាឡីស័កនៅតាមផ្ទះរៀងៗខ្លួន ។ ក្នុងករណីមានអាការមិនស្រួលខ្លួន ពលរដ្ឋអាចទៅពិនិត្យសំណាក នៅស្ថានីយរថភ្លើងប៉ោយប៉ែត មជ្ឈមណ្ឌលសំចតប៉ោយប៉ែត និងមន្ទីរពេទ្យបង្អែកប៉ោយប៉ែត ឬទំនាក់ទំនងទៅកាន់លេខ ០១២ ៩៨៣ ៨៥៦, ០៨៥ ៩៩៩ ៩១៧, ០៩៥ ៥០០ ០០៣, ០៨៩ ៥៥០ ០១៦ និង ០៩២ ៦៨៣ ២០៧។
 

គិតត្រឹមថ្ងៃទី១០ឧសភានេះ អ្នកឆ្លងកូវីដ-១៩សរុបទូទាំងប្រទេសកើនដល់ ១៩,៧៤៣នាក់ ដោយ ១១,៩២៣នាក់ ជាករណីសហគមន៍២០ កុម្ភៈ ខណៈអ្នកជាសះស្បើយ ៧,៨២០នាក់ និងអ្នកស្លាប់ឡើងដល់ ១២៦នាក់៕