នៅខេត្តព្រះសីហនុ ករណីថ្មីដែលរកឃើញកាលពីថ្ងៃទី៩ ខែឧសភា មាន៩៥នាក់ ដោយភាគច្រើនជាអាជីវករ និងក្រុមគ្រួសាររបស់ពួកគាត់ ក្នុងចំណោមនោះ ក៏មានក្មេងអាយុ១ខួប និង៤ខួបផងដែរ។

 

តាមសេចក្តីជូនដំណឹងរបស់រដ្ឋបាលខេត្តព្រះសីហនុ អ្នកជំងឺជាងពាក់កណ្តាល ជាអ្នកដែលបានតេស្តយកសំណាកនៅសាលាបឋមសិក្សាផ្សារលើ បន្ទាប់មកនៅវិទ្យាល័យហ៊ុន សែន មិត្តភាព វេទិកា៧មករា និងទីតាំងនៅភូមិ២សង្កាត់លេខ៣។

 

កំពង់ចាម  បានប្រកាសរកឃើញអ្នកឆ្លងកូវីដ-១៩ បន្ថែមចំនួន ១៦នាក់។ បច្ចុប្បន្នអាជ្ញាធរ បានបញ្ជូន អ្នកជំងឺទៅសម្រាកព្យាបាលនៅមន្ទីរពេទ្យមេគង្គកំពង់ចាម និងបន្តការស្រាវជ្រាវអ្នកពាក់ព័ន្ធ។

 

 បើតាមសេចក្ដីប្រកាសរបស់រដ្ឋបាលខេត្តកំពង់ចាម នៅថ្ងៃទី១០ឧសភា ក្នុងចំណោមអ្នកវិជ្ជមានកូវីដ-១៩ ចំនួន១៦នាក់ថ្មីនោះ មាន ២នាក់នៅស្រុកស្រីសន្ធរ, ២នាក់នៅស្រុកកងមាស,៧នាក់នៅស្រុកបាធាយ , ៤នាក់នៅស្រុកចំការលើ និង១នាក់ ក្នុងស្រុកកំពង់សៀម។ ជាមួយគ្នានេះ ខេត្តកំពង់ចាម ក៏មានមនុស្ស ៩នាក់ ជាសះស្បើយដែរ។

 

នៅខេត្តតាកែវ រដ្ឋបាលខេត្ត បានរកឃើញអ្នកវិជ្ជមានកូវីដ-១៩ ចំនួន២៣នាក់បន្ថែមទៀត នៅថ្ងៃទី៩ឧសភា ដោយក្នុងនោះមានកម្មកររោងចក្រ, អាជីវករ, កម្មករសំណង់ រហូតដល់ ទារិកា ផងដែរ។ នេះបើតាមសេចក្ដីជូនដំណឹងរបស់រដ្ឋបាលខេត្តតាកែវ។ រដ្ឋបាលខេត្តបានបញ្ជាក់ថា កម្មកររោងចក្រ ១០នាក់ វិជ្ជមានកូវីដ-១៩ ក្នុងនោះរោងចក្រ ជូនលី ២នាក់ និង៨នាក់ទៀត នៅរោងចក្រសាន់បូ ។ 

 

ចំណែកអ្នកវិជ្ជមានកូវីដ-១៩ ចំនួន ១៣នាក់ទៀតមាន អាជីវករផ្សារត្រាំខ្នារ១នាក់, អាជីវករនៅបឹងការប្រម១នាក់, អាជីវករនៅផ្សារបត់រការ១នាក់, អាជីវករនៅផ្សារយាយត្រប់១នាក់, កម្មករកាប់ជ្រូក២នាក់, អ្នកបើកឡានដឹកដី១នាក់, កម្មករសំណង់១នាក់ , ប្រជាពលរដ្ឋនៅភូមិត្រពាំងលាន ឃុំចំបក់២នាក់ និង ២នាក់ទៀតរស់នៅភូមិជើងរលាង និងភូមិព្រៃមូល។ រីឯទារិកា អាយុ១៨ខែម្នាក់ ក៏មានវិជ្ជកូវីដ-១៩ ផងដែរ។

 

គិតត្រឹមថ្ងៃទី៩ឧសភា ម្សិលមិញនេះ អ្នកឆ្លងកូវីដ-១៩ ទូទាំងប្រទេសចំនួន ១៩,៧៣៤នាក់ ក្នុងនោះករណីនាំចូលសរុបមានចំនួន ៥៧៨ករណី។ អ្នកជាសះស្បើយចំនួន ១១៩២៣នាក់ ខណៈអ្នកស្លាប់មានដល់ ១២៦នាក់៕