COVID-19
កីឡាជាតិ
ជាតិ
ការប្រកួតបាល់ទាត់លីគកំពូលកម្ពុជា ឆ្នាំ២០២១ នឹងវិលត្រឡប់មកវិញ នៅសប្ដាហ៍នេះ
×![]()
ដោយ៖ នី ណារិទ្ធ
ភ្នំពេញ៖ ការប្រកួតជើងឯកពានរង្វាន់មិត្តហ្វូនខេមបូឌានលីគ ២០២១នេះ នឹងវិលត្រឡប់មកវិញ នៅសប្ដាហ៍នេះ ដែលជាការប្រកួតបង្គ្រប់សប្ដាហ៍ទី២ ក្រោយមានការពន្យាពេលដោយសារវិបត្តិកូវីដ-១៩ ជាង១ខែមក។
ការប្រកួតបង្ក្រប់សប្ដាហ៍ទី២នេះ មានក្រុមចំនួន៨ ត្រូវប៉ះគ្នា ដើម្បីដណ្ដើម៣ពិន្ទុ។ ក្នុងនោះ ៤ក្រុមដែលត្រូវជួបគ្នានៅថ្ងៃទី១៥ ឧសភា មានក្រុមវិសាខា ត្រូវតទាល់ជាមួយ នគរបាលជាតិ នៅកីឡាដ្ឋាន ព្រីនស៍ វេលាម៉ោង ១៥:៣០ រសៀល។ បច្ចុប្បន្ននេះ វិសាខា ឈរនៅ៩ ដោយមាន១ពិន្ទុ ខណៈ នគរបាលជាតិ ឈរនៅលេខ១២ ដោយមិនទាន់ទទួលបានជ័យជម្នះសោះ។
ដោយឡែកក្រុមណាហ្គាវើលដ៍ ក៏ត្រូវជួប កងយោធពលខេមភូមិន្ទ នៅកីឡាដ្ឋាន អេ អ៊ី យូ ស្ពតផាក ដែរ។ ក្រុមទាំងពីរនេះ មានពិន្ទុខុសគ្នាតែ១ប៉ុណ្ណោះ គឺ ណាហ្គាវើលដ៏ ឈរលេខរៀងទី៦ ដោយមាន៦ពិន្ទុ ក្រោយលេងបាន៣ប្រកួត ហើយឈ្នះ២ និងចាញ់១ប្រកួត។ ចំណែក កងយោធពលខេមភូមិន្ទ ដែលលេងបាន៤ប្រកួតនោះ ឈ្នះ២ ចាញ់១ និងស្មើ១ កំពុងមាន៤ពិន្ទុក្នុងដៃ ឈរនៅលេខ៤។
រីឯការប្រកួតនៅថ្ងៃទី១៦ ឧសភាវិញ ក៏មាន៤ក្រុមត្រូវជួបគ្នាដែរ។ ក្នុងនោះអាស៊ីអឺរ៉ុបយូណាយធីត ដែលឈរលេខ៧ ក្រោយប្រកួតឈ្នះ១ និងចាញ់៣ប្រកួតនោះ ត្រូវទទួលភ្ញៀវ បឹងកេត នៅកីឡាដ្ឋាន អេ អ៊ី យូ ស្ពតផាក នាម៉ោង ១៥:៣០ រសៀល។ បច្ចុប្បន្នក្រុមបឹងកេត ឈ្នះនៅលេខ១១ ក្រោយប្រកួត២ដង ហើយមិនទាន់ទទួលបានជ័យជម្នះ។
ការប្រកួតនៅម៉ោងដំណាលគ្នានោះ ក៏មាន១គូទៀត គឺ ព្រៃវែង ត្រូវទទួលភ្ញៀវ សូលទីឡូអង្គរ នៅកីឡាដ្ឋាន ខេត្តព្រៃវែង ផងដែរ។ សូលទីឡូអង្គរ ដែលបានប្រកួត២លើកមកនេះ មិនទាន់ទទួលស្គាល់ថាឈ្នះនៅឡើយទេ ខណៈព្រៃវែង ឈរលេខ១០ ក្រោយប្រកួតបាន២លើក ចាញ់១ និងស្មើ១ មាន១ពិន្ទុក្នុងដៃ។
ការប្រកួតជើងឯកពានរង្វាន់មិត្តហ្វូនខេមបូឌានលីគ ២០២១នេះ ចាប់ផ្ដើមពីថ្ងៃទី៦ មីនា ២០២១ ដល់ថ្ងៃទី២ តុលា ២០២១។ ការប្រកួតនេះ បានដំណើរការតែ៤សប្ដាហ៍ហើយ។ ក្នុងនោះក្រុមអង្គរថាយហ្គឺរ ឈរលេខ១ មាន១០ពិន្ទុ ក្រោយប្រកួតឈ្នះ៣លើក ស្មើ១ ដែលតាមពីក្រោយដោយព្រះខ័នរាជស្វាយរៀង និងភ្នំពេញក្រោន ដែលមាន៩ពិន្ទុ ក្រោយឈ្នះ៣ប្រកួតដូចគ្នា៕
Tag:
កីឡា
COVID-19
© រក្សាសិទ្ធិដោយ thmeythmey.com
