រដ្ឋបាលខេត្តត្បូងឃ្មុំប្រកាសថាបានរកឃើញមនុស្សចំនួន ៨នាក់បន្ថែមទៀតវិជ្ជមានកូវីដ-១៩ នៅថ្ងៃទី១០ ឧសភា ដោយក្នុងនោះមានទារិការអាយុ៩ខែម្នាក់ផង។ តាមរដ្ឋបាលខេត្តត្បូងឃ្មុំក្នុងចំណោមអ្នកឆ្លងថ្មីទាំង៨នាក់នេះ មាន៦នាក់ជាពលរដ្ឋរស់នៅឃុំប៉ើស២ ស្រុកក្រូចឆ្មារ និង២នាក់ទៀត ទើបតែធ្វើដំណើរពីរាជធានីភ្នំពេញ។ 

 

ពាក់ព័ន្ធនឹងករណីវិជ្ជមានកូវីដ-១៩ លើពលរដ្ឋដែលទើបចាកចេញពីរាជធានីភ្នំពេញនេះដែរ ខេត្តព្រៃវែង ក៏បានរកឃើញមនុស្ស៤នាក់ដែរ មានតេស្តវិជ្ជមានកូវីដ-១៩ នៅថ្ងៃទី១០ឧសភា។ តាមការជូនដំណឹងរបស់រដ្ឋបាលខេត្តព្រៃវែងនៅទំព័រហ្វេសប៊ុក  អ្នកវិជ្ជមានទាំង៤នាក់នេះមាន ប្រុស២នាក់ និងស្រី២នាក់ ហើយពួកគេមានអាសយដ្ឋាននៅភូមិមានជ័យ ឃុំចុងអំពិល ស្រុកកញ្ជ្រៀច។ 

 

ដោយឡែករដ្ឋបាលខេត្តកំពង់ធំ ក៏បានប្រកាសរកឃើញមនុស្ស ៦នាក់បន្ថែមទៀតដែរ មានវិជ្ជមានកូវីដ-១៩ ដោយក្នុងនោះមានពលរដ្ឋ២នាក់ ជាអ្នកធ្វើដំណើរពីរាជធានីភ្នំពេញ, ២នាក់ទៀតជាអ្នកទើបធ្វើដំណើរពីខេត្តព្រះសីហនុ និង២នាក់ រស់នៅសង្កាត់អាចារ្យលាក់ ក្រុងស្ទឹងសែនស្រាប់។

 

ខេត្តកោះកុង ក៏មាន១ករណីថ្មីដែរ លើបុរសវ័យ៤២ឆ្នាំ ដែលមានអាសយដ្ឋាននៅឃុំបឹងព្រាវ ស្រុកស្រែអំបិល ខេត្តកោះកុង។ តាមសេចក្តីជូនដំណឹងរបស់រដ្ឋបាលខេត្តកោះកុង បុរសរូបនេះ បានធ្វើដំណើរពីភូមិសំបូរ ឃុំសំបូរ ស្រុកបាធាយ ខេត្តកំពង់ចាម ដែលជាតំបន់កំពុងមានករណីឆ្លងរាលដាលជំងឺកូវីដ-១៩ ដែរនោះ។

 

បើតាមរបាយការណ៍របស់ក្រសួងសុភិបាល នៅថ្ងៃទី១១ឧសភានេះ កម្ពុជាមានអ្នកឆ្លងកូវីដ-១៩ សរុប ២០ ២២៣នាក់ ដោយករណីនាំចូលមាន៥៨៨ករណី។ ចំណែកអ្នកជាសះស្បើយ ៨ ១៧០នាក់ ខណៈអ្នកស្លាប់កើនដល់ ១៣១នាក់៕