Man Utd ដែលប្រកួតចាញ់ Leicester ២-១ អស់ឱកាសទៅហើយដើម្បីប្រជែងពានលីគកំពូលអង់គ្លេសរដូវកាលនេះ។ ឆ្លងកាត់ការប្រកួត៣៥លើក ក្រុមលោក Ole Gunnar Solskjær រកបាន៧០ពិន្ទុ តាមពីក្រោមក្រុមមេឃខៀវចំនួន១០ពិន្ទុ ខណៈការប្រកួតនៅដល់៣លើកទៀតប៉ុណ្ណោះ។
 

លោក Pep Guardiola បានជួយ Man City ឈ្នះ Premier League ចំនួន៣លើកហើយគិតទាំងរដូវកាលនេះពោលគឺនៅរដូវកាល ២០១៧១៨, ២០១៨-១៩ និង ២០២០-២១នេះ ក្រោមការដឹកនាំរបស់លោករយៈពេល ៤ រដូវកាល។ អ្នកចាត់ការសញ្ជាតិអេស្ប៉ាញររូបនេះ ខកខានជួយក្រុម១លើកប៉ុណ្ណោះនៅរដូវកាល ២០១៩-២០ ដោយធ្លាក់ទៅលើ Liverpool។
 

ជ័យជម្នះរបស់ Leicester លើក្រុមបិសាចក្រហម បានជួយពួកគេ កក់ក្តៅសម្រាប់កៅអី Champions League រដូវកាលក្រោយ។ ក្រុមរហស្សនាមកញ្ជ្រោង កើនដល់៦៦ពិន្ទុ ពីការប្រកួត៣៦លើក ស្ថិតនៅចំណាត់ថ្នាក់ទី៣ក្នុងតារាងលីគកំពូលអង់គ្លេស ដោយនាំមុខក្រុមលេខ៤ Chelsea ដែលទើបប្រកួត៣៥លើក ចំនួន ២ពិន្ទុ និងលេខ៥ West Ham United ៨ពិន្ទុ៕