រដ្ឋបាល រាជធានីភ្នំពេញបានរកឃើញអ្នកវិជ្ជមានកូវីដ-១៩ ចំនួន ១៥២នាក់បន្ថែមទៀត នៅថ្ងៃទី១២ ខែឧសភា ដែលជាចំនួនឆ្លងតិចបំផុតចាប់តាំងពីថ្ងៃទី១៤មេសា ដែលជាថ្ងៃចូលឆ្នាំខ្មែរមក។ 

 

តាមរដ្ឋបាលរាជធានីភ្នំពេញ ក្នុងចំណោមអ្នកឆ្លងទាំង ១៥២នាក់នោះ មានទារក និងកុមារដែលមានអាយុក្រោម១៥ឆ្នាំ សរុប២៣នាក់។ អ្នកវិជ្ជមានដែលត្រូវបានរកឃើញនៅរាជធានីភ្នំពេញកាលពីថ្ងៃទី១២ឧសភានោះ មានដូចជាកងកម្លាំងប្រដាប់អាវុធ, មន្ត្រីក្រសួងផែនការ, មន្ត្រីក្រសួងសុខាភិបាល, អាជីរករ, កម្មករសំណង់, កម្មកររោងចក្រ, អ្នករត់ម៉ូតូកង់បី ,បុគ្គលិកផ្នែកអនាម័យ និងបុគ្គលិកក្រុមហ៊ុនឯកផងដែរ។ នេះបើមានសេចក្តីជូនដំណឹងរបស់រដ្ឋបាលរាជធានីភ្នំពេញ។

 

តាមរបាយការណ៍ដដែល ខណ្ឌដែលមានអ្នកឆ្លងជំងឺកូវីដ-១៩ច្រើនជាងគេ គឺខណ្ឌច្បារអំពៅ ត្រូវបានរកឃើញថាមានអ្នកឆ្លងច្រើនជាងគេ បន្ទាប់មកខណ្ឌពោធិ៍សែនជ័យ ខណ្ឌព្រែកព្នៅ ខណ្ឌមានជ័យ ខណ្ឌ៧មករា ខណ្ឌកំបូល ខណ្ឌឫស្សីកែវ ខណ្ឌដូនពេញ ខណ្ឌជ្រោយចង្វារ និងខណ្ឌចំការមន។ 

 

កម្ពុជា មានអ្នកឆ្លងកូវីដ-១៩ សរុប២១១៤១នាក់ហើយ ដោយករណីនាំចូលមាន៦០៦ករណី។ ចំណែកអ្នកជាសះស្បើយ៩៥១៩នាក់ ខណៈអ្នកស្លាប់កើនដល់ ១៤២នាក់៕