ដោយ៖ នី ណារិទ្ធ 

លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានលើកឡើងថា ភូមិសាស្រ្តនៅតំបន់ ខាងលើនេះ វាពិតជាសក្តិសមសម្រាប់ការរៀបចំព្រឹត្តិការណ៍ប្រណាំងកង់ ដោយសារតែជាតំបន់ទេសចរណ៍។ ម្យ៉ាងទៀតប្រភពធនធានកីឡាករ-កីឡាការិនី គ្រូបង្វឹក ភាគច្រន ក៏កើតចេញពីខេត្តតំបន់ទេសចរណ៍និងវប្បធម៌នេះផងដែរ ។
 

បើតាមលោក ចំរើន ខេត្តសៀមរាបមានហេដ្ឋារចនាសម្ព័ន តំបន់ទេសចរណ៍ជាច្រើន ដូចជាព្រលានយន្តហោះ ផ្លូវថ្នល់ ទីតាំងប្រាសាទបុរាណ ឧទ្យានភ្នំគូលែន ដែលអាចរៀបចំការប្រកួតប្រភេទ កង់ភ្នំ កង់គក់ ដែលក្រុមការងារបច្ចេកទេសបានចុះទៅត្រួតពិនិត្យម្ដងរួចមកហើយ ។ 
 

ដោយឡែកខេត្តព្រះសីហនុ គឺជាតំបន់ឆ្នេរសមុទ្រដែលមានភាពទាក់ទាញ ដែលសហព័ន្ធធ្លាប់បានរៀបចំការប្រកួតកីឡាប្រណាំងកង់ពិភពលោក ដោយជោគជ័យម្ដងហើយ កាលពីដើមឆ្នាំ២០២០។ ខេត្តឆ្នេរសមុទ្រមួយនេះ នឹងអាចទាក់ទាញភ្ញៀវជាតិនិងអន្តរជាតិ ចូលរួមទស្សនាគាំទ្រព្រឹត្តិការណ៍កីឡាស៊ីហ្គេម នាឆ្នាំ២០២៣ ខាងមុខ ។ ចំណែកខេត្តកែប ក៏មានលក្ខណស្រដៀងគ្នានិងខេត្តព្រះស៊ីហនុផងដែរ។ នេះបើតាមអគ្គលេខាធិការសហព័ន្ធខ្មែរកីឡាទោចក្រយាន។
 

«ក្នុងចំណោមខេត្តទាំង៣ គឺខេត្តសៀមរាប ដែលមានអទិភាពជាងគេសម្រាប់ការប្រណាំងកង់នៃការទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣»។ នេះបើតាមលោក នូ ចំរើន។
 

ការប្រកួតកីឡាស៊ីហ្គេមឆ្នាំ២០២៣ នឹងប្រព្រឹត្តទៅចាប់ថ្ងៃទី៥-១៧ ខែឧសភា ឆ្នាំ២០២៣។ ចំណែកការប្រកួតកីឡាអាស៊ានប៉ារ៉ាហ្គេមប្រព្រឹត្តទៅចាប់ថ្ងៃទី១-១០ ខែមិថុនា ឆ្នាំ២០២៣៕