បទ បថ្យាវត្ត
 

ល្បិចល្បងល្បីល្បើកក្រើកឮឆ្ងាយ ចង់ឲ្យគេផ្សាយថែមLiveក្រោយមុខ

បណ្តាញបណ្តាក់ដាក់តាម Facebook ភ្លេចគិតថ្ងៃមុខសល់កេរ្តិ៍អាស្រូវ។

 

ខ្លះចង់ល្បីខ្លាំងតាំងភ្លេចខុសត្រូវ ឡូឡាតាមផ្លូវឥតក្រែងសម្តី

អួតរឿងលុយឡានវីឡាទិញថ្មី ហ៊ានហារមាត់ស្តីបំពានគេឯង។

 

ខ្លះអាងអណ្តាតប្រមាថឥតក្រែង សម្តីសម្តែងអួតឯងអ្នកណាស់

បញ្ចេញទ្រឹស្តីអ្វីក៏បែបច្បាស់ ក្នុងខ្លួនវិញខ្វះបែរមើលរំលង។

 

ខ្លះចង់ល្បីខ្លាំងតាំងធ្វើរឿងឆ្គង មើលមិនទំនងទំនៀមជាខ្មែរ

ក្រុមលក់អនឡាញបណ្តាញចែៗ ចង់ចេញកេរ្តិ៍ម៉ែស្លៀកវៀលខើចខ្លី។

 

លក់ឡេក៏សឿងបង្ហាញសាច់ខ្ចី មិនមែនស្មេរស្តីបន្តុះបង្អាប់

និយាយតាមស្តែងក្រែងលោកអ្នកស្តាប់ បានដឹងខ្លួនឆាប់ឈប់ធ្វើរឿងឆ្គង៕