មួយរយៈចុងក្រោយនេះ ករណីឆ្លងកូវីដ-១៩ នៅវៀតណាមនៅតែបន្តហក់ឡើង ខណៈពេលអាជ្ញាធរ បានបិទតំបន់ និងកំណត់កន្លែង ដែលមានករណីឆ្លងកូវីដ-១៩ ខ្លាំង។ នៅថ្ងៃទី១៦ ខែឧសភា វៀតណាម បានអះអាងថា មានករណីឆ្លងចំនួន ១២៧ករណី ប៉ុន្តែនៅថ្ងៃត្រង់ អាជ្ញាធរបានរាយការណ៍ ករណីឆ្លងចំនួន ៦ករណីទៀត ដោយទាំងអស់ ១៣៣ករណី។ នេះបើតាមការចុះផ្សាយរបស់សារព័ត៌មាន Vietnam Express។ 

 

យ៉ាងណាមិញ ចំនួនអ្នកឆ្លងនេះ គឺធ្លាក់ចុះបន្តិច បើធៀបនឹងថ្ងៃទី១៥ ខែឧសភា ដែលមានរហូតដល់ទៅ ១៦៩ករណី និងជាករណីឆ្លងច្រើនបំផុតរបស់វៀតណាម។ 

 

ករណីឆ្លងភាគច្រើន មាននៅវៀតណាមភាគខាងជើង ដែលជាតំបន់បិទខ្ទប់ ដើម្បីទប់ស្កាត់ការរីកសាយ។ ជាមួយគ្នានេះ វៀតណាម ក៏មានករណីឆ្លងកូវីដ-១៩ នៅក្នុងរោងចក្រ ក្នុងខេត្ត Bac Giang ផងដែរ ដែលក្រសួងសុខាភិបាលវៀតណាម បានបញ្ជូនក្រុមអ្នកជំនាញទៅ ដើម្បីត្រួតពិនិត្យ។ 

 

គិតត្រឹមតួលេខចុងក្រោយ វៀតណាម មានករណីឆ្លងសរុបចំនួន ៤១១២ករណី និងអ្នកស្លាប់មានចំនួន ៣៦នាក់។ ចំណែកអ្នកជាសះស្បើយមានចំនួន ២៦៦៨នាក់៕