បើតាមការបញ្ជាក់ពីលោកអភិបាលក្រុងសៀមរាប អាជ្ញាធរបានក្ដាប់មូលហេតុនៃការឆេះព្រៃនេះបានហើយ តែលោកសុំមិនធ្វើអត្ថាធិប្បាយ ដោយទុកឱ្យអ្នកជំនាញធ្វើការបន្ត។ 

 

កាលពីឆ្នាំទៅ ហេតុការណ៍ដូចគ្នានេះបានកើតឡើងនៅតំបន់ខាងកើតបឹងពារាំង ដែលបណ្ដាលឱ្យឆេះព្រៃប្រមាណ៨ហិកតាផងដែរ។ យ៉ាងណា មួយឆ្នាំកន្លងមក ព្រៃទាំងនោះបានលូតលាស់ធំធាត់ដូចធម្មតាឡើងវិញ។ នេះជាការបញ្ជាក់របស់លោក នួន ពុទ្ធារ៉ា។

 

លោកអភិបាលក្រុងបានអំពាវនាវដល់ពលរដ្ឋទាំងអស់ ត្រូវមានស្មារតីចូលរួមជាមួយអាជ្ញាធរ ដើម្បីទប់ស្កាត់ និងថែរក្សាធនធានធម្មជាតិនៅតំបន់ព្រៃលិចទឹកនានាក្នុងក្រុងសៀមរាប។ ដ្បិតថា ធនធានធម្មជាតិទាំងនោះ មានសារប្រយោជន៍ច្រើនដល់ប្រព័ន្ធជីវៈចម្រុះ ហើយប្រព័ន្ធជីវៈចម្រុះទាំងនោះ នឹងផ្តល់សារប្រយោជន៍ដ៏ច្រើនលើសលុបដល់ជីវិតរស់នៅរបស់មនុស្ស៕