ការប្រកួតសប្ដាហ៍ទី៣ នេះ នឹងមានការជួបគ្នារវាងក្រុមវិសាខា និងព្រះខ័នរាជស្វាយរៀង , សូលទីឡូអង្គរ ត្រូវជួប គីរីវង់សុខសែនជ័យ និងភ្នំពេញក្រោន ប៉ះក្រុមចំណូលថ្មី ខេត្តព្រៃវែង ។ គូប្រកួតទាំងនេះ នឹងត្រូវជួបគ្នា នៅថ្ងៃទី២២ ឧសភា។ ដោយឡែក២គូទៀត គឺក្រុមនគរបាលជាតិ ត្រូវជួបណាហ្គាវើលដ៍ ខណៈអង្គរថាយហ្គឺរ ប៉ះបឹងកេត នាថ្ងៃទី២៣ ឧសភា។
 

វិសាខា ដែលនឹងបើកទ្វាកីឡដ្ឋាន ព្រីនស៍ ចាំទទួលក្រុមខ្លាំង ព្រះខ័នរាជស្វាយរៀង នាសប្ដាហ៍ទី៣ នៅម៉ោង៣រសៀលនេះ មិនទាន់ស្គាល់ពាក្យថាឈ្នះឡើយ ក្រោយប្រកួតបានត្រឹមតែស្មើ២លើក មាន២ពិន្ទុ ខណៈព្រះខ័នរាជស្វាយរៀង វិញមិនដែលចាញ់សោះ ក្រោយឈ្នះទាំង៣ មាន៩ពិន្ទុ ។ 
 

ចំណែកភ្នំពេញក្រោន ដែលឈ្នះទាំង៣ប្រកួត ហើយកំពុងឈរលេខ៣ ត្រូវប៉ះក្រុមចំណូលថ្មី ខេត្តព្រៃវែង នាម៉ោង៦៖៣០នាទីល្ងាច។ ក្រុមខេត្តព្រៃវែង សម្បូរទៅដោយកីឡាករវ័យក្មេង ដែលកំពុងបង្ហាញទម្រង់លេងយ៉ាងល្អ ក្រោយយកឈ្នះក្រុមសូលទីឡូអង្គរ ដោយលទ្ធផល៦ទល់០ កាលពីសប្ដាហ៍មុន។
 

តាមរយៈលទ្ធផលប្រកួតកន្លងមក ក្រុ អង្គរថាយហ្គឺរ ដែលមិនទាន់ចាញ់នោះ ឈរនៅកំពូលតារា ដោយមាន១០ពិន្ទុក្នុងដៃ បន្ទាប់ពីប្រកួត៤លើក ឈ្នះ៣ និងស្មើ១ ។ ចំណែកក្រុមព្រះខ័នរាជស្វាយរៀង និងភ្នំពេញក្រោន មាន៩ពិន្ទុដូចគ្នា ៕