លោក អៀង ពិសិដ្ឋ អភិបាលស្រុកស្វាយលើ បានប្រាប់សារព័ត៌មានថ្មីៗថា ជាទូទៅឱ្យតែមានភ្លៀងធ្លាក់នាដើមរដូវវស្សា ផ្កាចាហួយចាប់ផ្តើមរីក និងបង្ហាញខ្លួនយ៉ាងច្រើននៅតំបន់ព្រៃឈើក្នុងស្រុកស្វាយលើ ដែលសម្បូរព្រៃឈើ និងជិតជួរភ្នំគូលេន។ លោកបន្ថែមថា ផ្កាចាហួយគឺជាការកម្សាន្តថ្មីមួយបែបទៀតសម្រាប់ភ្ញៀវទេសចរ។ តែដោយសារបញ្ហាជំងឺកូវីដ ធ្វើឱ្យទេសចរមិនអាចទៅទស្សនាផ្កាចាហួយច្រើននោះទេ។

 

តាមការរៀបរាប់របស់លោកអភិបាលស្រុកស្វាយលើ ផ្កាចាហួយ សម្បូរនៅតាមព្រៃសហគមន៍ជុំវិញស្រុកស្វាយលើ ហើយនៅទីនោះ មានការគ្រប់គ្រងយ៉ាងល្អ ពីបណ្ដាញសហគមន៍ព្រៃឈើ។ ក្នុងនោះរដ្ឋបាលស្រុកបានផ្សព្វផ្សាយ និងណែនាំឱ្យសហគមន៍ ចេះថែរក្សាធនធានព្រៃឈើ កុំឱ្យឆេះជាដើម ក្នុងន័យអភិរក្សប្រព័ន្ធជីវៈចម្រុះទាំងនោះ សម្រាប់ប្រយោជន៍ដល់សហគមន៍ក្នុងវិស័យទេសចរណ៍។

 

ក្នុងនាមរដ្ឋបាលស្រុក លោក អៀង ពិសិដ្ឋ ក៏ស្នើឱ្យទេសចរ ងាកមកកម្សាន្តបែបធម្មជាតិ ឱ្យបានច្រើន ដើម្បីគាំទ្រសហគមន៍នៅមូលដ្ឋាន ពិសេសអភិរក្សធនធានធម្មជាតិនៅតំបន់ទាំងនោះឱ្យគង់វង្សសម្រាប់អ្នកជំនាន់ក្រោយៗ៕