ការសម្រេចចិត្តនេះ ដោយសារលោក Southgate ត្រូវពិចារណាលើការរងរបួសពីសំណាក់កីឡាករសំខាន់ៗមួយចំនួនផងដែរ រួមមាន Harry Maguire ខ្សែការពារកណ្តាលក្រុម Manchester United និងអ្នកចាំទី Nick Pope របស់ Burnley។ អ្នកទាំងពីរសុទ្ធតែរងរបួសក្នុងការប្រកួតលីគ នៅកៀកថ្ងៃបិទបញ្ចប់រដូវកាល។
អ្វីដែលជាបញ្ហាលំបាកសម្រាប់គ្រូបង្វឹក វ័យ៥០ឆ្នាំរូបនេះ ដោយសារក្រុមនៅ Premier League ដល់ទៅ៣ ដែលសម្បូទៅដោយកីឡាករសញ្ជាតិអង់គ្លេសត្រូវលេងវគ្គផ្តាច់ព្រ័ត្រក្របខណ្ឌអឺរ៉ុបនៅចុងសប្តាហ៍នេះ។
Manchester United នឹងត្រូវតតាំងជាមួយ Villarreal ដើម្បីដណ្តើមពាន Europa League នៅវគ្គផ្តាច់ព្រ័ត្រ នារាត្រីថ្ងៃទី២៧ ខែឧសភា ខណៈ Manchester City ត្រូវប្រជែងជាមួយ Chelsea នៅវគ្គផ្តាច់ព្រ័ត្រ Champions League នៅ២ថ្ងៃបន្ទាប់។
បើតាមគម្រោងលោក Southgate នឹងប្រកាសសមាសភាពកីឡាករ ២៦រូប ចុងក្រោយនៅថ្ងៃទី១ ខែមិថុនា មុនពេលក្រុមរហស្សនាមតោកំណាចនេះ ត្រូវប្រកួតមិត្តភាពជាមួយអូទ្រីសនៅថ្ងៃទី២ ខែមិថុនា និងរ៉ូម៉ានីនៅ៤ថ្ងៃបន្ទាប់ ។ ដ្បិតមិនទាន់ប្រកាសជាផ្លូវការក្តី តែគ្រូជម្រើសជាតិអង់គ្លេសរូបនេះ ឆ្លៀតបង្ហាញឈ្មោះកីឡាករ៣៣នាក់បណ្ដោះអាសន្ន សម្រាប់ពានរង្វាន់អឺរ៉ុបនេះ។ ប៉ុន្តែក្នុងចំណោមកីឡាករទាំងនេះ នឹងមានកីឡាករ៧រូប នឹងត្រូវជម្រុះចេញវិញដែរ។
កីឡាករទាំង៣៣រូបនេះ មានអ្នកចាំទី ៖ Dean Henderson (Man Utd), Sam Johnstone (West Brom), Jordan Pickford (Everton), Aaron Ramsdale (Sheff Utd)។
ខ្សែការពារ ៖ John Stones (Man City), Luke Shaw (Man Utd), Harry Maguire (Man Utd), Trent Alexander-Arnold (Liverpool), Kyle Walker (Man City), Tyrone Mings (Aston Villa), Reece James (Chelsea), Conor Coady (Wolves), Ben Chilwell (Chelsea), Ben Godfrey (Everton), Kieran Trippier (Atletico Madrid), Ben White (Brighton)។
ខ្សែបម្រើ៖ Mason Mount (Chelsea), Declan Rice (West Ham), Jordan Henderson (Liverpool), Jude Bellingham (Borussia Dortmund), Kalvin Phillips (Leeds), Jesse Lingard (Man Utd), James Ward-Prowse (Southampton)។
ខ្សែប្រយុទ្ធ ៖ Harry Kane (Tottenham), Marcus Rashford (Man Utd), Raheem Sterling (Man City), Dominic Calvert-Lewin (Everton), Phil Foden (Man City), Jack Grealish (Aston Villa), Mason Greenwood (Man Utd), Ollie Watkins (Aston Villa), Jadon Sancho (Borussia Dortmund), Bukayo Saka (Arsenal)។
ការប្រកួតដំបូងរបស់ក្រុមអង់គ្លេសនៅពានរង្វាន់អឺរ៉ុប Euro ២០២០ ត្រូវប៉ះក្រូអាស៊ី នៅពូល D នាថ្ងៃទី១៣ ខែមិថុនា។ ពូល D មាន៤ក្រុម រួមមានអង់គ្លេស ក្រូអាស៊ី ស្កុតឡែន និងឆែក៕