បេឡារុស នៅសប្តាហ៍មុន បានបង្ខំឱ្យយន្តហោះអ្នកដំណើរ Ryanair  ដែលហោះចេញពីក្រិក ទៅលីទុយអានី ឱ្យចុះចតជាច្រើនម៉ោងនៅក្រុងមីនស្កិ៍ ក្រោមហេតុផលថាយន្តហោះនោះមានផ្ទុះគ្រាប់បែក។ ប៉ុន្តែបន្ទាប់ពីចុះចត អាជ្ញាធរបេឡារុស បែរជាចាប់ខ្លួនអ្នកកាសែត Roman Protasevich និងដៃគូលោកទៅវិញ។ បន្ទាប់ពីចាប់ខ្លួនអ្នកកាសែត និងជាអ្នករិះគន់ដ៏ខ្លាំងម្នាក់លោក AlexanderLukashenko សហភាពអឺរ៉ុបបានឯកភាពដាក់ទណ្ឌកម្មបេឡារុស និងខណៈបណ្តាប្រទេសផ្សេងទៀតរិះគន់យ៉ាងខ្លាំងលើការចាប់ខ្លួនអ្នកកាសែត។ 

 

ជាការឆ្លើយតបនឹងទណ្ឌកម្ម និងរិះគន់ លោកប្រធានាធិបតី Lukashenko បានការពារសកម្មភាពរដ្ឋាភិបាលខ្លួន ដែលបង្ខំឱ្យយន្តហោះដឹកអ្នកដំណើរចុះចត ជាទង្វើស្របច្បាប់ និងផ្អែកតាមច្បាប់អន្តរជាតិ ព្រោះសកម្មភាពនោះ គ្រាន់តែចង់ការពារប្រជាជនតែប៉ុណ្ណោះ។ មិនតែប៉ុណ្ណោះ ប្រធានាធិបតីរូបនេះ ក៏បានច្រានចោលព័ត៌មានទាក់ទិននឹងការបញ្ជូនយន្តហោះចម្បាំង Mig-29 ទៅបង្ខំឱ្យយន្តហោះ Ryanair ចុះចតផងដែរ។ 

 

ក្នុងសេចក្តីថ្លែងការណ៍លើដំបូងចំពោះការចាប់ខ្លួនអ្នកកាសែតនេះ លោក Lukashenko បានសង្កត់ធ្ងន់ថា ការចាប់ខ្លួន លោក Protasevich ធ្វើឡើង ក្នុងគោលបំណងប្រឆាំងនឹងការបះបោរបង្ហូរឈាម ដែលអ្នកកាសែតរូបនេះ បានគ្រោងទុក។ លោក Protasevich ជាសហស្ថាបនិកក្រុម Nexta លើប្រព័ន្ធទំនាក់ទំនង Telegram ដែលប្រើសម្រាប់អំពាវនាវឱ្យធ្វើបាតុកម្មនៅបេឡារុស។ ក្រុមនេះ មានអ្នកចូលរួមរហូតទៅដល់ពីរលាននាក់ឯណោះ។

 

ស្របគ្នានេះដែរ លោកប្រធានាធិបតីក៏បានចោទសហគមន៍អន្តរជាតិ ចំពោះការជ្រៀតជ្រែកការដឹកនាំរបស់លោកនៅក្នុងប្រទេសផងដែរ។ បើតាមលោក Lukashenko ក្រុមអ្នករិះគន់នៅក្រៅប្រទេស បានប្រើយុទ្ធសាស្រ្តសង្រ្គាមកូនកាត់ (Hybrid War)។ 

 

«យើងត្រូវតែធ្វើគ្រប់យ៉ាង ដើម្បីបង្ការកុំឱ្យធ្លាក់ចូលទៅក្នុងសង្រ្គាមពិតប្រាកដ»។ មេដឹកនាំបេឡារុស បានលើកឡើងបែបនេះ នៅក្នុងសភា។ ទន្ទឹមគ្នានេះ លោក Lukashenko បានបន្តថា លោកនឹងឆ្លើយតបយ៉ាងចាស់ដៃលើទណ្ឌកម្ម ដែលដាក់មកលើបេឡារុស។ 

 

សូមបញ្ជាក់ថា គិតមកត្រឹមពេលនេះ លោក Lukashenko បានដឹកនាំបេឡារុស ២៧ឆ្នាំហើយ។ ក្នុងការបោះឆ្នោតឆ្នាំ២០២០ មេដឹកនាំរូបនេះ បានប្រកាសថា ខ្លួនឈ្នះការបោះឆ្នោតប្រធានាធិបតិ ដែលកាលនោះបានធ្វើឱ្យផ្ទុះបាតុកម្មយ៉ាងខ្លាំងនៅទូទាំងប្រទេស៕