បើតាមប្រព័ន្ធផ្សព្វផ្សាយសាធារណៈរបស់ដាណឺម៉ាក Danmarks Radio (DR) ចារកិច្ចអាមេរិក បានលួចតាមដានអ្នកនយោបាយ និងមន្រ្តីជាន់ខ្ពស់ប្រទេសអឺរ៉ុបពីឆ្នាំ២០១២ ដល់ឆ្នាំ២០១៤ ដោយប្រើប្រាស់បណ្ដាញអ៊ីនធឺណិតចារកិច្ចយោធារបស់ដាណឺម៉ាក។ អធិការបតីអាល្លឺម៉ង់ អែនជែល មឺហ្គែល និងមន្ត្រីបារាំង ន័រវ៉េស ស៊ុយអែត សុទ្ធតែត្រូវបានលួចយកសម្ងាត់ដោយអាមេរិក។

 

រដ្ឋមន្ត្រីការពារជាតិដាណឺម៉ាក Trine Bramsen ដែលចូលកាន់តំណែងនៅឆ្នាំ២០១៩ ត្រូវបានរាយការណ៍ពីករណីនេះនៅខែមេសា ឆ្នាំ២០២០ ។ លោកស្រី Bramsen ប្រាប់ DR ថា ការលួចយកការណ៍លើសម្ពន្ធមិត្តជារឿងមិនអាចទទួលបានយកបានឡើយ។ យ៉ាងណាមិញ ប្រព័ន្ធផ្សព្វផ្សាយរដ្ឋដាណឺម៉ាកមួយនេះ មិនបានបញ្ជាក់ថា ដាណឺម៉ាកអនុញ្ញាតឱ្យអាមេរិកប្រើបណ្ដាញរបស់ខ្លួនឬយ៉ាងណាឡើយ។   

 

ព័ត៌មានខាងលើ ត្រូវបានទម្លាយក្នុងរបាយការណ៍ស៊ើបអង្កេតរួមគ្នាដោយរវាង DR និងដៃគូនៅស៊ុយអែតមានទូរទស្សន៍ STV, នៅន័រវ៉េសមានបណ្ដាញទូរទស្សន៍ និងវិទ្យុ NRK, នៅអាល្លឺម៉ង់មានកាសែត Suddeutsche Zeitung និងនៅបារាំងមានកាសែត Le Monde ។

 

ក្នុងការផ្សាយរបស់ខ្លួន DR បញ្ជាក់ថា ទីភ្នាក់ងារសន្តិសុខជាតិអាមេរិក អាចចូលមើលសារ SMS, ការហៅទូរសព្ទ និងការប្រើប្រាស់អ៊ីនធឺណិតដូចជាការ Search, Chat និងសេវាកម្មផ្ញើសារមួយចំនួនទៀត។ អង្គភាពព័ត៌មានដដែលបន្តថា ព័ត៌មានលម្អិតទាំងអស់ ត្រូវបញ្ចូលក្នុងការរបាយការណ៍សម្ងាត់មួយដោយមានឈ្មោះថា Operation Dunhammer និងត្រូវដាក់ឱ្យមេដឹកនាំចារកិច្ចដាណឺម៉ាកនៅឆ្នាំ២០១៥ ផងដែរ។

 

ទាក់ទងរឿងនេះ រដ្ឋមន្រ្តីទទួលបន្ទុកកិច្ចការអឺរ៉ុបរបស់បារាំងលោក Clement Beaune និយាយថា វាជារឿងធ្ងន់ធ្ងរបំផុត បើរបាយការណ៍ខាងលើជាការពិត។ លោកប្រាប់វិទ្យុ France Info Radio ថា រវាងសម្ពន្ធមិត្ត ត្រូវមានការទុកចិត្ត និងកិច្ចសហប្រតិបត្តិការ។ ប៉ុន្តែលោក Beaune ក៏បញ្ជាក់ថា គេត្រូវបញ្ជាក់ការពិតទាក់រឿងនេះ មុននឹងធ្វើការសន្និដ្ឋានដោយផ្អែកលើកិច្ចសហប្រតិបត្តិការ។