អ្នកចាត់ការទូទៅសញ្ជាតិបារាំង សម្រេចចិត្តលាលែងពីតំណែងដឹកនាំ Real Madrid ជាលើកទី២ ក្នុងអាជីពអ្នកចាត់ការ នៅថ្ងៃទី២៧ ខែឧសភា បន្ទាប់ពីមិនទទួលបានពានរង្វាន់អ្វីសោះនៅរដូវកាល ២០២០-២១នេះ។
 

Zidane ធ្លាប់គ្រប់គ្រងក្រុមរហស្សនាមអធិរាជស ចន្លោះឆ្នាំ ២០១៦ ដល់ ២០១៨ មុនចាកចេញពី Santiago Bernabéu ក្រោយជួយក្រុមឈ្នះ Champions League ៣រដូវកាលជាប់គ្នា។ ក្រោយចាកចេញបានរយៈពេល ១០ខែ បុរសវ័យ៤៨ឆ្នាំ បានត្រឡប់ទៅដឹកនាំសារជាថ្មី និងជួយក្រុមឈ្នះ La Liga នៅរដូវកាល ២០១៩-២០។
 

យ៉ាងណា ការចាកចេញជាលើកទី២នេះ Zidane ដែលធ្លាប់ជាកីឡាករឆ្នើមរបស់ Real ចន្លោះឆ្នាំ២០០១ ដល់២០០៦ បានសារភាពថា បើទោះជាខ្លួនដាក់គម្រោង និងយុទ្ធសាស្ត្រដើម្បីស្តារក្រុមជាថ្មីក្តី ក៏ប្រហែលជាមិនបានផលដែរ ព្រោះថ្នាក់ដឹកនាំលែងមានជំនឿចិត្តលើលោកទៅហើយ។
 

នៅក្នុងលិខិតចំហទៅកាន់អ្នកគាំទ្រ Real Madrid ដែលកាសែតអេស្ប៉ាញ AS បានចុះផ្សាយ អតីតប្រធានក្រុមជម្រើសជាតិបារាំងបានសរសេរថា៖ «ខ្ញុំចាកចេញ ពីព្រោះខ្ញុំបានដឹងថាក្លិបលែងមានជំនឿលើខ្ញុំ ដែលខ្ញុំត្រូវការ។ ខ្ញុំយល់ពីបាល់ទាត់ ហើយខ្ញុំដឹងពីតម្រូវការក្លិបដូចជា Real Madrid នេះ។ ខ្ញុំដឹងថា ពេលអ្នកណាម្នាក់មិនអាចជួយក្រុមឈ្នះពាន នោះអ្នកត្រូវតែចាកចេញ»៕