ក្រុមរហស្សនាមតោកំណាចអង់គ្លេស ក្រោមការដឹកនាំរបស់លោក Southgate ធ្លាប់បានឈានដល់វគ្គ៤ក្រុមចុងក្រោយពានរង្វាន់ពិភពលោក World Cup ឆ្នាំ ២០១៨។ ក្នុងការប្រកាសសមាសភាពកីឡាករទាំង២៦រូបចុងក្រោយដើម្បីឆ្ពោះទៅប្រជែងពានប្រចាំទ្វីបអឺរ៉ុប គ្រូសញ្ជាតិអង់គ្លេស ត្រូវបានអ្នកសារព័ត៌មានចុចសួរអំពីគោលដៅរបស់លោក។
 

នៅពេលសួរថាតើលទ្ធផលបែបណាដែលអង់គ្លេសអាចទទួលបានទាបបំផុតនៅ Euro 2020 លោក Southgate បានឆ្លើយភ្លាមថា វគ្គពាក់កណ្តាលផ្តាច់ព្រ័ត្រគឺទាបបំផុតសម្រាប់អង់គ្លេស។
 

«យើងបានត្រៀមខ្លួនរួចជាស្រេច។ យើងដាក់គោលដៅទាបបំផុតត្រឹមវគ្គពាក់កណ្តាលផ្តាច់ព្រ័ត្រ ដូច្នេះជំហានបន្ទាប់គឺត្រូវព្យាយាមថែមទៀត»។ នេះជាការលើកឡើងរបស់លោក Southgate មុនបន្ថែមថាបើមិនដូច្នោះទេនោះជាបរាជ័យសម្រាប់អង់គ្លេសហើយ។ 
 

អតីតគ្រូ Middlesbrough ហ៊ានអះអាងដូច្នេះ ដោយលោកមើលឃើញពីគុណភាពកីឡាកររបស់លោកដែលបានជ្រើសរើសរួចទាំង២៦រូប។
 

លោក Southgate នឹងត្រូវដឹកនាំអង់គ្លេសប្រកួតបើកឆាកទល់នឹងក្រូអាស៊ីនៅពូល D នាថ្ងៃទី១៣ ខែមិថុនា ខណៈព្រឹត្តិការណ៍ Euro 2020 នឹងចាប់ផ្តើមការប្រកួតផ្លូវការពីថ្ងៃទី១២ ខែមិថុនា តទៅ៕