តាមរយៈហ្វេសប៊ុករបស់ខ្លួន លោក វូ ក្វាងមិញ បានរៀបរាប់ថា ពលរដ្ឋដែលរស់នៅលើផ្ទៃទឹកតាមដងទន្លេនៅទីក្រុងភ្នំពេញ គឺជាគ្រួសារក្រីក្រដែលមានទាំងជនជាតិខ្មែរឥស្លាម ហើយមានប្រហែល១ពាន់គ្រួសារ ជាអ្នកមានដើមកំណើតវៀតណាម។ លោក បានអះអាងបន្ថែម នៅលើគណនីហ្វេសប៊ុករបស់ខ្លួន នាថ្ងៃទី៤មិថុនា ដូច្នេះ៖« ប្រជាជនទាំងនោះបានរស់នៅទីនេះ អស់ជាច្រើនជំនាន់ជាង៤០ឆ្នាំមកហើយ និងមានបណ្ណស្នាក់នៅស្របច្បាប់ផងដែរ»។ 

 

លោកបានលើកឡើងបែបនេះ បន្ទាប់ពីបានជិះកាណូតទៅពិនិត្យស្ថានភាពជាក់ស្តែងជាមួយ លោក ស៊ីម ជី ប្រធានសមាគមខ្មែរ-វៀតណាមនៅកម្ពុជា នៅតំបន់ដែលតម្រូវឲ្យរុះរើចេញ។ បើតាមលោកឯកអគ្គរដ្ឋទូតវៀតណាមរូបនេះ ការដាក់កំហិតត្រឹម៧ថ្ងៃ ឱ្យប្រជាជនទាំងនោះចាកចេញពីផ្ទៃទឹក  គឺពេលវេលាមួយដ៏លឿនពេក ដែលមិនអាចអនុវត្តទៅរួចឡើយ។ ព្រោះគ្រួសារភាគច្រើន គឺក្រីក្រខ្លាំងណាស់ មានតែផ្ទះតូចៗអណ្តែតទឹក និងទូកមួយគ្រឿង ដែលបានមកពីការខ្ចីប្រាក់ដើម្បីចិញ្ចឹមត្រី និងការធ្វើនេសាទជាលក្ខណៈគ្រួសារ។

 

សូមជម្រាបថា កាលពីថ្ងៃទី២មិថុនា លោក ឃួង ស្រេង អភិបាលរាជធានីភ្នំពេញ បានចេញលិខិតជូនដំណឹងដល់អ្នកមានផ្ទះបណ្ដែតទឹកលើផ្ទៃទន្លេទាំងអស់ ឱ្យរុះរើចេញជាបន្ទាន់ត្រឹមថ្ងៃទី៩មិថុនា ឆ្នាំ២០២១។ លោក បានបញ្ជាក់ថា ក្នុងករណីបើនរណារឹងរូស មិនព្រមរុះរើផ្ទះបណ្ដែតទឹក, ផ្ទះទូកតូចៗ និងសំណង់មិនរៀបរយលើផ្ទៃទឹក និងបែចិញ្ចឹមត្រី អាជ្ញាធរនឹងកសាងសំណុំរឿងបញ្ជូនទៅតុលាការ ដោះស្រាយតាមច្បាប់៕