ក្នុងបទសម្ភាសជាមួយសារព័ត៌មានថ្មីៗ២៥ លោក ម៉ន អុន បានរៀបរាប់ថា គោលបំណងនៃការបង្កើតព្រៃសហគមន៍នេះ ដើម្បីរក្សាព្រៃឈើទុកដល់កូនចៅជំនាន់ក្រោយ។ លោក អុន បានបញ្ជាក់ដូច្នេះ៖ « ខ្ញុំជាអាជ្ញាធរ ដូច្នេះត្រូវនាំពលរដ្ឋទុកព្រៃនេះ ដើម្បីសម្រាប់គោរពបូជា និងទុកឱ្យកូនចៅជំនាន់ក្រោយឱ្យបានស្គាល់ព្រៃដែលមានឈើស្ដុកស្ដម្ភ និងឈើប្រណិតៗ។ ព្រោះតែព្រៃយើងបច្ចុប្បន្ននេះ អស់ច្រើន ពិសេសនៅខេត្តត្បូងឃ្មុំ ស្រុកតំបែរនេះ ពីដើមមកព្រៃមានមិនតិចទេ អ៊ីចឹងពេលនេះ ខ្ញុំមានលទ្ធភាពនាំគ្នាទុកព្រៃនេះមួយដែរ»។  

 

បើតាមលោក ម៉ន អុន ព្រៃសហគមន៍កំពែង មានស្រះទឹកបុរាណ ផ្លូវរទេះបុរាណ រោងអ្នកតានិងឈើកម្រមួយចំនួន ព្រមទាំងបក្សីកម្រដូចជាកេងកង និងចំពុះសជាដើម ។ មេភូមិរូបនេះ បានអះអាងថា ទៅថ្ងៃមុខ សហគមន៍កំពែងនឹងរៀបចំ ស្ដារស្រះទឹកបុរាណឡើងវិញ,រៀបចំផ្លូវក្រវ៉ាត់ជុំវិញព្រៃ សម្រាប់កសិករដឹកកសិផល, រៀបចំផ្លូវរទេះបុរាណឡើងវិញ ដើម្បីដឹកភ្ញៀវទេសចរណ៍ចូលមើលក្នុងព្រៃសហគមន៍ និងរៀបចំកញ្ជុះអង្គុយ ដើម្បីទាក់ទងភ្ញៀវទេសចរមកកម្សាន្ត ៕