សមាជិកក្រុម និងបុគ្គលិក គ្រូបង្វឹក របស់ក្រុមជម្រើសជាតិអេស្ប៉ាញ សុទ្ធតែត្រូវដាក់ឱ្យនៅដាច់ដោយឡែកបន្ទាប់ពី Busquets ខែបម្រើ Barcelona តេស្តវិជ្ជមានកូវីដ-១៩ ក្រោយការប្រកួតមិត្តភាពទល់នឹងព័រទុយហ្កាល់កាលពីថ្ងៃទី៦ ខែមិថុនា។ ២ថ្ងៃបន្ទាប់ Llorente ខ្សែការពារ Leeds United ក៏ត្រូវបានប្រកាសថាឆ្លងជំងឺរាតត្បាតនេះដែរ។
 

ក្រោយមានកីឡាករឆ្លងកូវីដ-១៩ គ្រូបង្វឹកអេស្ប៉ាញលោក Luis Enrique បានកោះហៅកីឡាករចំនួន៦រូបបន្ថែមទៅហ្វឹកហាត់ដែលរួមមានអ្នកចាំទី Kepa Arrizabalaga, Raul Albiol, Carlos Soler, Brais Mendez, Pablo Fornals និង Rodrigo Moreno។ ចំណោមពួកគេនឹងត្រូវសម្រេចយកខ្លះដើម្បីទៅប្រជែងពានអឺរ៉ុប។
 

លើសពីនេះ RFEF ក៏បានអះអាងដែរថា កីឡាករអាយុក្រោម២១ឆ្នាំរបស់អេស្ប៉ាញដែលទើបយកឈ្នះលីទុយអានី ៤-០ ក្នុងការប្រកួតមិត្តភាពកន្លងទៅ អាចនឹងបញ្ចូលក្នុងក្រុមឈុតធំ ប្រសិនបើមានអ្នកឆ្លងជាបន្តបន្ទាប់ទៀត។
 

Rubiales បារម្ភយ៉ាងខ្លាំងសម្រាប់សមាសភាពក្រុមអេស្ប៉ាញ ខណៈលោកជឿជាក់ថានឹងមានកីឡាករ ឬបុគ្គលិកនឹងតេស្តវិជ្ញមានជំងឺរាតត្បាតនេះមិនខាន ខណៈក្រុមនឹងត្រូវប៉ះស៊ុយអែតក្នុងការប្រកួតបើកឆាកពូល E នៅរាត្រីថ្ងៃទី១៥ ខែមិថុនា៕