ក្នុងសារសំឡេងរយៈពេលជាង៧នាទី របស់ សម្ដេច ហ៊ុន សែន នាយកមន្រ្តីនៃកម្ពុជា  បានសង្កត់ធ្ងន់ថា សកម្មភាពនៃការបោះឆ្នោតសាកល្បងនេះ មិនមែនជារឿងចាំបាច់ឡើយ ខណៈពេលនេះជំងឺកូវីដ-១៩ កំពុងរាតដាលខ្លាំង ដែលក្នុងមួយថ្ងៃៗ មានអ្នកឆ្លងរាប់រយនាក់ និងមានមនុស្សស្លាប់ជារៀងរាល់ថ្ងៃ។ 
 

តាមរយៈសារសំឡេងដដែល សម្ដេច ហ៊ុន សែន ក៏បានបញ្ជាឱ្យអភិបាលរាជធានីខេត្តទាំងអស់ លុបចោលការប្រមូលមនុស្សមករៀនសូត្រហ្វឹកហាត់ការបោះឆ្នោះសាកល្បងនៅថ្ងៃស្អែកទី៩ មិថុនា នេះជាបន្ទាន់។ សម្ដេច ហ៊ុន សែន បានបញ្ជាក់ដូច្នេះ៖ « ពេលវេលានេះ យើងត្រូវផ្ដល់អទិភាពប្រមូលគ្រប់កម្លាំងទាំងអស់ ដើម្បីប្រយុទ្ធប្រឆាំងជាមួយជំងឺកូវីដ-១៩ វាមិនមែនជាពេលវេលាដើម្បីឱ្យប្រជាជនមករៀនសូត្របោះឆ្នោតនោះឡើយ»។ 
 

ជាមួយគ្នានេះ សម្ដេច ហ៊ុន សែន បានសុំការយោគយល់ពីគណៈកម្មាធិការជាតិរៀបចំការបោះឆ្នោត (គ.ជ.ប)  ព្រោះសម្ដេចគ្មានជម្រើសអ្វីក្រៅពីនេះ ក្នុងការគ្រប់គ្រងនឹងដោះស្រាយបញ្ហាកូវីដ-១៩៕