ដោយ៖ ឈួ ស៊ាវយីងជាវ

 

អាជ្ញាធររដ្ឋ New South Wales និង Queensland កំពុងស្វះស្វែងរកអ្នកពាក់ព័ន្ធ និងទីតាំងដែលប្តីប្រពន្ធមួយគូបានទៅ ដើម្បីបង្ការករណីឆ្លងជំងឺកូវីដ-១៩។ អាជ្ញាធររដ្ឋ Queensland នៅថ្ងៃទី៩ ខែមិថុនា បានប្រកាសថា ស្រ្តីដែលមានវ័យ ៤៤ឆ្នាំរូបនេះ ត្រូវបានធ្វើតេស្តវិជ្ជមានកូវីដ-១៩នៅរដ្ឋ Queensland ហើយប្តីរបស់គាត់ ក៏មានលទ្ធផលវិជ្ជមានផងដែរ។ ប្តីប្រពន្ធមួយគូនេះ អាចប្រឈមនឹងបទចោទព្រហ្មទណ្ឌ ចំពោះការល្មើសបម្រាមនៃវិធានការរឹតត្បិតការធ្វើដំណើរ។

 

ទន្ទឹមនេះ អាជ្ញាធរនៅរដ្ឋ Queensland បានចេញសេចក្ដីជូនដំណឹងឱ្យមានការប្រុងប្រយ័ត្ន នៅទីតាំងមួយចំនួននៃឆ្នេរ Sunshine ដែលជាតំបន់ទេសចរណ៍ពេញនិយម និងតំបន់ពីរផ្សេងទៀត ដើម្បីបង្ការការរីកសាយនៃជំងឺកូវីដ-១៩។ ចំណែកអាជ្ញាធរនៅរដ្ឋ New South Wales បានអះអាងថា អ្នកដំណើរមួយគូនេះបានធ្វើដំណើរ ឆ្លងកាត់ទីក្រុងក្នុងរដ្ឋមួយនេះ រយៈពេល៥ថ្ងៃ នៅសប្តាហ៍មុន។

 

«ការជូនដំណឹង ទៅដល់សហគមន៍ក្នុងតំបន់របស់យើង ក្នុងគោលបំណងឱ្យមានការប្រុងប្រយ័ត្នខ្ពស់ ហើយនេះជាគ្រោះថ្នាក់ជាក់ស្ដែងសម្រាប់យើងទាំងអស់គ្នា។ រដ្ឋមន្រ្តីសុខាភិបាលប្រចាំរដ្ឋ New South Wales លោក Nrad Hazzard ថ្លែងបែបនេះ ដោយបន្ថែមថា អ្នកមានផ្ទុកជំងឺកូវីដ-១៩ ឆ្លងកាត់ និងឈប់សំចតនៅកន្លែងជាច្រើន។ 

 

យ៉ាងណាមិញ នៅក្នុងកិច្ចសម្ភាសជាមួយអ្នកសារព័ត៌មាន រដ្ឋមន្រ្តីសុខាភិបាលរដ្ឋ Queensland  លោក Yvette D'Ath បានអះអាងថា ករណីឆ្លងជំងឺកូវីដ-១៩ របស់ប្តីប្រពន្ធទាំងពីរ ទំនងជាស្ថិតនៅដំណាក់កាលចុងក្រោយនៃរយៈពេលឆ្លងរបស់ជំងឺកូវីដ-១៩ ។ ក្នុងន័យនេះ លោករដ្ឋមន្រ្តីចង់បញ្ជាក់ថា ការចម្លងជំងឺកូវីដ-១៩ ពីសំណាក់ប្តីប្រពន្ធទាំងពីរទៅអ្នកដទៃ គឺមានកម្រិតទាប។ 

 

គួរបញ្ជាក់ថារដ្ឋ New South Wales ដែលជារដ្ឋមានចំនួនប្រជាជនច្រើនជាងគេក្នុងប្រទេស មិនបានរាយការណ៍ពីករណីឆ្លងក្នុងស្រុកជាងមួយខែមកហើយ ខណៈរដ្ឋ Queensland ក៏បានប្រកាស ករណីឆ្លងចុងក្រោយ តាំងពីខែមីនាមក។

 

គិតត្រឹមពេលនេះ អូស្រ្តាលី មានករណីឆ្លងជំងឺកូវីដ-១៩ សរុបចំនួនជាង ៣ម៉ឺនករណី  និងអ្នកស្លាប់មានចំនួន៩១០នាក់។ ចំណែកអ្នកជាសះស្បើយមានចំនួន ២៩១៥៦នាក់៕