អន្តរជាតិ
លោក បៃដិន ប្រកាសគម្រោងបរិច្ចាគវ៉ាក់សាំង៥០០លានដូសដើម្បីប្រយុទ្ធនឹងជំងឺកូវីដ-១៩ ប្រធានាធិបតីអាមេរិក ចូ បៃឌិន ថ្លែងទៅកាន់អ្នកសារព័ត៌មាន ដោយមានលោក Albert Bourla នាយកប្រតិបត្តិក្រុមហ៊ុន Pifzer ឈរក្បែរ។ រូបថត AFP
×
ដោយ៖ ឈួស៊ាវយីងជាវ
ប្រធានាធិបតីអាមេរិក ចូ បៃដិន នៅថ្ងៃទី១០ ខែមិថុនា ប្រកាសបរិច្ចាគវ៉ាក់សាំងបង្ការជំងឺកូវីដ-១៩ ចំនួន៥០០លានដូសរបស់ក្រុមហ៊ុន Pfizer ឱ្យបណ្ដាប្រទេសក្រីក្របំផុតក្នុងពិភពលោក។ លោកចាត់ទុកចំនួនវ៉ាក់សាំងដ៏ច្រើននេះ នឹងជួយជំរុញយុទ្ធនាការប្រឆាំងជំងឺផ្លូវដង្ហើមមួយនេះលើពិភពលោក ហើយអាមេរិកមិនចង់បានអ្វីត្រឡប់មកវិញឡើយ។ ប្រទេសមានសេដ្ឋកិច្ចរីកចម្រើនលើពិភពលោកទាំង៧ (G7) ក៏រំពឹងថា នឹងបរិច្ចាគវ៉ាក់សាំងរាប់រយលានដូសដែរ។
ដោយមាននាយកប្រតិបត្តិក្រុមហ៊ុន Pfizer លោក Albert Bourla ឈរក្បែរផង ប្រធានាធិបតីអាមេរិក ចូ បៃឌិន ប្រកាសផែនការផ្ដល់វ៉ាក់សាំងបង្ការជំងឺកូវីដ-១៩ ចំនួនកន្លះពាន់លានដូសសម្រាប់ប្រទេសមានចំណូលទាប និងមធ្យមលើពិភពលោក។ លោក បៃឌិន អះអាងថា ជំនួយរបស់អាមេរិក គ្មានចំណងអ្វីឡើយ។
ការបរិច្ចាគវ៉ាក់សាំងរបស់យើង មិនមានសម្ពាធដើម្បីបានការគាំទ្រផ្នែកនយោបាយណាមួយឬសម្បទានអ្វីទេ។ យើងកំពុងធ្វើដើម្បីជួយជីវិតមនុស្សតែប៉ុណ្ណោះ។» ប្រធានាធិបតីអាមេរិកបញ្ជាក់បែបនេះពីទីក្រុងមាត់សមុទ្រ Cornwall របស់អង់គ្លេស ដែលជាទីលោកចូលរួមក្នុងជំនួបមេដឹកនាំប្រទេសអ្នកមានទាំង៧ (G7) ។
គម្រោងបរិច្ចាគវ៉ាក់សាំងចំនួនដ៏ច្រើននេះ ធ្វើឱ្យអាមេរិកត្រូវចំណាយលុយដល់ទៅ៣,៥ពាន់លានដុល្លារដើម្បីទិញវ៉ាក់សាំង។ ប៉ុន្តែអាមេរិកនឹងជំរុញឱ្យមានការបរិច្ចាគបន្ថែមពីមេដឹកនាំនៃប្រទេសអ្នកមានទាំង៧ផ្សេងទៀតផងដែរ។ ក្រុមហ៊ុន Pfizer និង BioNTech យល់ព្រមផ្គត់ផ្គង់វ៉ាក់សាំងឱ្យអាមេរិកចំនួន២០០លានដូសនៅឆ្នាំ២០២១ និង៣០០លានដូសទៀតនៅឆមាសទីមួយឆ្នាំ២០២២ ។
ប្រទេសប្រហែល១០០ នឹងទទួលបានវ៉ាក់សាំងដែលផលិតនៅរោងចក្ររបស់ Pfizer នៅអាមេរិក ហើយក្រុមហ៊ុន លក់វ៉ាក់សាំងដោយមិនគិតចំណេញឡើយ។ វ៉ាក់សាំង៥០០លានដូសនេះ ជាការផ្ដល់បន្ថែមពីលើវ៉ាក់សាំង៨០លានដូសដែលរដ្ឋបាលលោក បៃឌិន ប្រកាសរួចហើយកន្លងមក។
ការប្រកាសរបស់អាមេរិក ត្រូវបានស្វាគមន៍ខ្លាំង។ ប៉ុន្តែគេក៏ឃើញមានការទទូចឱ្យប្រទេសអ្នកមានបញ្ចេញវ៉ាក់សាំងដែលស្តុកក្នុងឃ្លាំងពួកគេផងដែរ។ ប្រធានផ្នែកវ៉ាក់សាំងរបស់អង្គការ Oxfam ប្រចាំអាមេរិក លោក Niko Lusiani អះអាងថា ប្រទេសអ្នកមានគួរតែធ្វើឱ្យបានច្រើនជាងនេះ ព្រោះការបរិច្ចាគពេលនេះ មិនទាន់គ្រប់នឹងតម្រូវការជាក់ស្ដែងឡើយ។
តាមពិតទៅ ប្រទេស G7 ក៏ត្រៀមផ្ដល់វ៉ាក់សាំងផងដែរ។ នាយករដ្ឋមន្ត្រីអង់គ្លេស បូរីស ចនសុន រំពឹងថា មេដឹកនាំ G7 នឹងឯកភាពគ្នាលើការផ្ដល់វ៉ាក់សាំងចំនួនមួយពាន់លានដូសសម្រាប់ប្រទេសនានាជុំវិញពិភពលោក សំដៅជំរុញការចាក់វ៉ាក់សាំងនៅត្រឹមឆ្នាំ២០២២។ កិច្ចប្រជុំ G7 នឹងចាប់ផ្ដើមនៅថ្ងៃទី១១ ហើយបញ្ចប់នៅថ្ងៃទី១៣ ខែមិថុនា ដោយមានអង់គ្លេសជាម្ចាស់ផ្ទះ។ លោក ចនសុន ក៏បានប្រកាសថា អង់គ្លេសនឹងផ្តល់វ៉ាក់សាំងយ៉ាងតិច១០០លានដូសទៅកាន់ប្រទេសក្រីក្រដែរ ដោយ ៨០លានដូសចែកចាយតាមយន្តការ COVAX ឯ២០លានដូស ទៀតនឹងត្រូវចែករំលែកទៅកាន់បណ្ដាប្រទេសដែលត្រូវការដោយផ្ទាល់៕
© រក្សាសិទ្ធិដោយ thmeythmey.com