ដាណឺម៉ាកចាប់ផ្តើមជំនួប Euro 2020 នៅទឹកដីខ្លួន ដ៏ខ្លាំងក្លា តាមរយៈការវាយសម្រុកលើហ្វាំងឡង់យ៉ាងខ្លាំង ប៉ុន្តែឈានដល់នាទី៤១ រឿងរ៉ាវរន្ធត់បានកើតឡើងដោយសារខ្សែបម្រើឆ្នើម Christian Eriksen បានដួលនៅលើទីលាន ហើយត្រូវបានសង្គ្រោះបឋម (CPR) មុនពេលបញ្ជូនទៅកាន់មន្ទីរពេទ្យ។ 

 

ក្រោយហេតុការណ៍នេះ កីឡាករ និងអ្នកគាំទ្រទាំងពីរក្រុមសោកសៅយ៉ាងខ្លាំង ហើយលោកអាជ្ញាកណ្តាល Anthony Taylor បានសម្រេចព្យួរការប្រកួតក្រោមហេតុផលវេជ្ជសាស្ត្របន្ទាន់ (Medical Emergency)។ ក្រោយការព្រមព្រៀងគ្នារវាងកីឡាករនៃក្រុមទាំងពីរ ការប្រកួតនៅកីឡដ្ឋាន Parken បានចាប់ផ្តើមឡើងវិញនារយៈពេលជាង២ម៉ោងក្រោយមក។

 

នៅនាទី៥៩ Joel Pohjanpalo បានតែតបាល់បញ្ចូលទីនាំឲ្យហ្វាំងឡង់ឈ្នះ ១-០ ជាប្រវត្តិសាស្ត្រ ប៉ុន្តែគេ និងមិត្តរួមក្រុមមិនមានការអបអរឡើយ ដើម្បីសំដែងការគោរពចំពោះ Eriksen និងក្រុមម្ចាស់ផ្ទះដាណឺម៉ាក។ តាមពិតទៅ ដាណឺម៉ាក មានឱកាសតាមស្មើក្រោយខ្សែការពារហ្វាំងឡង់បង្កកំហុសលើ Yussef Poulsen នៅតំបន់គ្រោះថ្នាក់ ប៉ុន្តែការទាត់របស់ Pierre-Emile Hojbjerg ត្រូវបានសង្គ្រោះដោយអ្នកចាំទី Lukas Hradecky។

 

ក្រោយការប្រកួត លោក Kasper Hjulmand គ្រូបង្វឹកក្រុមជម្រើសជាតិដាណឺម៉ាក បានលើកឡើងថា កីឡាករដាណឺម៉ាកទាំងអស់ប្រកួតទាំងមិនមានអារម្មណ៍ល្អ ដោយសារតែពួកគេគិតដល់ Eriksen។ សហព័ន្ធកីឡាបាល់ទាត់ដាណឺម៉ាក បានអះអាងថា ស្ថានភាពររបស់ Eriksen បានធូរស្រាល ហើយថែមទាំងដឹងខ្លួនផងដែរ។

បែលហ្ស៊ិកទទួលជ័យជម្នះ ៣-០ លើម្ចាស់ផ្ទះរុស្ស៊ី នៅកីឡដ្ឋាន Saint Petersburg សម្រាប់ការប្រកួតពូល B។ Romelu Lukaku រកបាន២គ្រាប់នៅ១០នាទីដំបួង និង២នាទីចុងក្រោយ ខណៈ១គ្រាប់ទៀតសម្រេចបានដោយ Thomas Meunier នៅពាក់កណ្តាលតង់ទីមួយ។

 

«Chris, Chirs, I love you» Lukaku បានស្រែកបែបនេះនៅមុខកាមេរ៉ា ក្រោយស៊ុតបាល់បញ្ចូលទី ដើម្បីជូនពរដល់ Christian Erisen មិត្តរួមក្លិប Inter Milan របស់ខ្លួនឲ្យឆាប់ជាសះស្បើយ។

 

សម្រាប់ពូល B បែលហ្ស៊ិក និងហ្វាំងឡង់ មាន៣ពិន្ទុនាំមុខបណ្តោះអាសន្ន ខណៈដាណឺម៉ាក និងរុស្ស៊ី ត្រូវបន្តប្រឹងប្រែងឲ្យបានខ្ពស់សម្រាប់ជំនួបបន្តបន្ទាប់ទៀត។

 

នាការប្រកួតពូល A កាលពីក្បាលព្រលប់ ខ្សែប្រយុទ្ធវេលស៍ Kieffer Moore ដែលប៉ង់ក្រណាត់ក្រហមរុំរបួសក្បាល បានតែតបាល់បញ្ចូលទីតាមស្មើស្វីស ១-១ ដើម្បីចែករំលែក១ពិន្ទុពីការប្រកួតដំបូងក្នុងពូល A នាកីឡដ្ឋានក្រុងបាគូ ប្រទេសអាស៊ែបៃហ្សង់។ 

 

គ្រាប់បាល់បញ្ចូលទីនៅនាទី៧៤របស់វេលស៍នេះ កើតឡើងក្រោយពេលដែល Breel Embolo បានតែតបញ្ចូលទីនាំមុខ១គ្រាប់មុនសម្រាប់ស្វីសនៅដើមតង់ទី២ ហើយស្វីស ក៏មានឱកាសបង្កើនការនាំមុខផងដែរ ប៉ុន្តែគ្រាប់បាល់បញ្ចូលទីរបស់ Mario Gavranovic ស្ថិតក្នុងជំហរក្រៅល្បែង ក្រោយការពិនិត្យរបស់ VAR។

 

អ៊ីតាលីដែលបានយកឈ្នះតួកគី ៣-០ នាការប្រកួតដំបូងបំផុត ឈរលេខ១បណ្តោះអាសន្នក្នុងពូល A៕