ជាតិ
នយោបាយជាតិ
គណបក្សប្រជាជន សម្រេចឱ្យលោក ប្រាជ្ញ ច័ន្ទ ជាប្រធានគ.ជ.ប ជំនួសលោក ស៊ិក ប៊ុនហុក លោក ប្រាជ្ញ ច័ន្ទ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា
× ភ្នំពេញ៖ គណបក្សប្រជាជនកម្ពុជា បានសម្រេចយកលោក ប្រាជ្ញ ច័ន្ទ ជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ជំនួសលោក ស៊ិក ប៊ុនហុក។ នេះបើតាមលោក ឡេង ប៉េងឡុង អ្នកនាំពាក្យរដ្ឋសភា។
លោក ឡេង ប៉េងឡុង បានបញ្ជាក់ថា គណៈកម្មាធិការអចិន្ត្រៃយ៍រដ្ឋសភា នឹងប្រជុំពិនិត្យលើការផ្លាស់ប្ដូរសមាភាពប្រធានគ.ជ.ប នេះ នៅសប្ដាហ៍ក្រោយ ដើម្បីរៀបចំរបៀបវារៈ ដាក់ចូលក្នុងកិច្ចប្រជុំពេញអង្គ។
កាលពីថ្ងៃទី៤ មិថុនា គណៈកម្មាធិការអចិន្ត្រៃយ៍រដ្ឋសភា បានអនុម័តយល់ព្រមលើសំណើរលាឈប់ពីតួនាទីនិងតំណែងប្រធាននៃគណៈកម្មាធិការជាតិរៀបចំការបោះឆ្នោតរបស់ ស៊ិក ប៊ុនហុក។លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានប្រាប់សារព័ត៌មានថ្មីៗ ថា ការសុំលាលែងរបស់លោក ស៊ិក ប៊ុកហុក បច្ចុប្បន្នអាយុ៧៥ឆ្នាំ ក្រោមហេតុផលសុខភាពមិនទៀងទាត់ និងចាស់ទ្រុឌទ្រោម។
កាលពីខែមេសា ឆ្នាំ២០១៥ លោក ស៊ិក ប៊ុនហុក បានកាន់តំណែងជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បន្តពីលោក អ៊ឹម សួស្តី ដែលបានកាន់តំណែងនេះ តាំងពីឆ្នាំ២០០២ មក។
ក្រោយលោក ស៊ិក ប៊ុនហុក លាឈប់ពីប្រធានគ.ជ.ប នេះ រដ្ឋសភា បានប្រកាសជ្រើសរើសបេក្ខភាពជំនួស ដោយប្រើពេលរយៈ៥ថ្ងៃ តាមច្បាប់បោះឆ្នោត។ ការប្រកាសជ្រើសរើសនេះ គឺមានតែបេក្ខជន២រូបប៉ុណ្ណោះ ដែលដាក់ពាក្យឈរឈ្មោះជាប្រធានគ.ជ.ប ក្នុងនោះមានលោក ប្រាជ្ញ ច័ន្ទ ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា និងលោក ការ លាន ជាមន្ត្រីជាន់ខ្ពស់ និងធ្លាប់ជាអភិបាលរងខេត្តព្រះវិហារ៕
© រក្សាសិទ្ធិដោយ thmeythmey.com