ក្នុងកិច្ចប្រជុំពេញអង្គថ្ងៃទីបីនៃគណៈមជ្ឈិមបក្សពលករកូរ៉េខាងជើង ដែលធ្វើឡើងនៅថ្ងៃទី១៧ ខែមិថុនា មេដឹកនាំកូរ៉េខាងជើង លោក គីម ជុងអ៊ុន បានដាក់ចេញយុទ្ធសាស្រ្តទំនាក់ទំនងរបស់លោកជាមួយអាមេរិក និងវិភាគពីគោលនយោបាយការបរទេសរដ្ឋបាលក្រុងវ៉ាស៊ីតោនថ្មី មកលើក្រុងព្យុងយ៉ាង។ ទាក់ទិននឹងបញ្ហានេះ លោក គីម បានជំរុញឱ្យកូរ៉េខាងជើង ត្រូវតែត្រៀមខ្លួនជាមុន ទាំងការចរចា និងការប្រឈមមុខជាមួយអាមេរិក។ 

 

«កូរ៉េខាងជើងត្រូវត្រៀមទាំងកិច្ចពិភាក្សា និងការប្រឈមមុខ ជាពិសេសត្រូវត្រៀមលក្ខណៈឱ្យបានគ្រប់គ្រាន់ ដើម្បីប្រឈមមុខ ក្នុងការការពារសេចក្តីថ្លៃថ្នូរដ្ឋ និងធានាឱ្យបានបរិយាកាសប្រកបដោយសន្តិភាព»។ មេដឹកនាំកូរ៉េខាងជើង បានលើកឡើងបែបនេះ។  ជាមួយគ្នាដែរ លោកគីម បានអំពាវនាវឱ្យមានកិច្ចខំប្រឹងប្រែង និងដោះស្រាយយ៉ាងឆាប់រហ័សទៅនឹងស្ថានភាពដែលកំពុងផ្លាស់ប្តូរ និងចូលរួមក្នុងការគ្រប់គ្រងស្ថានភាពនៅឧបទ្វីបកូរ៉េ។

 

កន្លងមក រដ្ឋាភិបាលក្រុងវ៉ាស៊ីនតោន បានដាក់ចេញគោលនយោបាយថ្មីមួយ នៅចំពោះមុខក្រុងព្យុងយ៉ាង។ គោលនយោបាយនោះ ​ត្រូវបានអាមេរិកហៅថា ជា​ការអនុវត្ត​វិធីសាស្ត្រ​បែប​ជាក់ស្តែង។ យ៉ាងណាមិញ គោលនយោបាយមួយនេះ ត្រូវបានកូរ៉េខាងជើង ចាត់ទុកជា «គោលនយោបាយបង្កសត្រូវ»។ មិនតែប៉ុណ្ណោះ ក្រុងព្យុងយ៉ាង ក៏បានឌឺដងផងដែរថា  វាគឺជាការយល់ច្រឡំដ៏ធំ ដែលអាមេរិក អាចដោះស្រាយការគំរាមកំហែងពីកូរ៉េខាងជើងបាន តាមរយៈការទូត និងការព្រមានរបស់ខ្លួន។ 

 

គួររំលឹកថា ក្នុងដំណើរទស្សនកិច្ចនៅអាមេរិករបស់ប្រធានាធិបតីកូរ៉េខាងត្បូង ក្នុងខែឧសភាកន្លងមក  លោក បៃឌិន បានប្រាប់លោក មូន ចេអ៊ីន ថា លោកនឹងមិនជួបជាមួយលោកគីម ទេ លុះត្រាតែមានផែនការច្បាស់លាស់ ក្នុងការចរចាលើកម្មវិធីរំសាយអាវុធនុយក្លេអ៊ែរ។ លើសពីនេះ លោក បៃឌិន បានរិះគន់យ៉ាងខ្លាំងជុំវិញទំនាក់ទំនងរបស់លោក ត្រាំ និងលោក គីមផងដែរ ដោយមេដឹកនាំអាមេរិករូបនេះ បានអះអាងថា លោកនឹងមិនដើរតាមអ្វីដែលលោកត្រាំបានធ្វើជាមួយកូរ៉េខាងជើងនោះទេ៕