បន្ទាប់ពីបានយកឈ្នះតួកគី ៣-០ និងស្វីស ៣-០ អ៊ីតាលីបន្តយកឈ្នះវេលស៍ ១-០ ដែលសម្រេចបានដោយ Matteo Pessina នៅនាទី៣៩។ វេលស៍បានបាត់សមាជិកម្នាក់នៅនាទី៥៦ ដោយ Ethan Ampadu បានទទួលកាតក្រហម។
 

 

ខ្សែបម្រើវេលស៍ Aaron Ramsey (ឆ្វេង) ដណ្តើមបាល់ជាមួយខ្សែបម្រើអ៊ីតាលី Giacomo Raspadori។ រូបថត UEFA

ជ័យជម្នះនេះ នាំឲ្យអ៊ីតាលីទទួលបាន៩ពិន្ទុពេញ ខណៈវេលស៍មាន៤ពិន្ទុ (+១) ក្រោយស្មើស្វីស ១-១ និងឈ្នះតួកគី ២-០។ 

 

នាការប្រកួតម៉ោងដូចគ្នា ស្វីសបានយកឈ្នះតួកគី ៣-១ ប៉ុន្តែមិនទាន់ទទួលបានកៅអីទៅកាន់វគ្គ១៦ក្រុមចុងក្រោយឡើយ ដោយរង់ចាំអ៊ុតមើលពូលផ្សេងទៀត សម្រាប់តំណែងក្រុមលេខ៣ឆ្នើម។ ស្វីសមាន៤ពិន្ទុ (-១) ខណៈតួកគីចាញ់ទាំង៣ប្រកួតជាប់គ្នា ត្រូវហាលអាវ។

Xherdan Shaqiri រកបាន២គ្រាប់ក្នុងជ័យជម្នះ ៣-១ របស់ស្វីសលើតួកគី។ រូបថត UEFA

៣គ្រាប់របស់ស្វីសសម្រេចបានដោយ Haris Seferovic ១គ្រាប់ និង Xherdan Shaqiri ២គ្រាប់ ដែលជាការបញ្ជូនទាំងអស់របស់ Steven Zuber រីឯគ្រាប់បាល់តែមួយគ្រាប់គត់របស់តួកគី រកបានដោយ Irfan Kahveci។

 

កីឡាករឆ្នើមប្រចាំការប្រកួត Star of the Match នៃការប្រកួតចុងក្រោយនេះ មាន ខ្សែបម្រើអ៊ីតាលី Federico Chiesa និងខ្សែបម្រើស្វីស Xherdan Shaqiri។

 

សម្រាប់ការប្រកួតវគ្គ១៦ក្រុមចុងក្រោយ អ៊ីតាលី ត្រូវតទល់ជាមួយក្រុមលេខ២ពូល C ខណៈវេលស៍ត្រូវប៉ះលេខ២ពូល B៕