រដ្ឋ Tamil Nadu ជាពិសេសនៅក្នុង Chennai ភាគខាងត្បូងក្នុងប្រទេសឥណ្ឌា ដែលជាតំបន់ឧស្សាហកម្មយានយន្តដ៏ធំ បានអនុញ្ញាតឲ្យប្រតិបត្តិការ១០០ភាគរយឡើងវិញ លើការផលិតរថយន្តដើម្បីឆ្លើយតបទៅនឹងតម្រូវការទីផ្សារសកល។

 

តាមការផ្សាយរបស់ Reuters ការព្រួយបារម្ភពីការរាលដាលកូវីដ-១៩ នៅតែបន្តមាន ខណៈរបាយការណ៍បង្ហាញថា កម្មករ៣នាក់ក្នុងចំណោម៤នាក់ដែលបម្រើការនៅរោងចក្រ Ford, Hyundai និង Rnault-Nissan ក្បែរក្រុង Chennai មិនទានបានចាក់វ៉ាក់សាំងបង្ការកូវីដ-១៩។

 

របាយការណ៍បានបន្ថែមថា កម្មករម្នាក់ក្នុងចំណោម៧នាក់នៅក្រុមហ៊ុនទាំងនោះ មានវិជ្ជមានកូវីដ-១៩ និង២១នាក់ហើយដែលបានទទួលមរណភាព។ ដូច្នេះបែបបទការងារតម្រូវឲ្យមានការប្រុងប្រយ័ត្នខ្ពស់ ជាពិសេសការអនុវត្តគម្លាតសុវត្ថិភាព។

 

ករណីកូវីដ-១៩ថ្មីនៅរដ្ឋ Tamil Nadu បានថយចុះពីជាង៣ម៉ឺនក្នុង១ថ្ងៃក្នុងខែឧសភា មកត្រឹម៨០០០ករណីក្នុង១ថ្ងៃ ប៉ុន្តែនៅតែជាចំនួនដ៏ខ្ពស់បំផុតមួយនៅឥណ្ឌា។ 

 

យុទ្ធនាការចាក់វ៉ាក់សាំងក៏ត្រូវបានជំរុញផងដែរសម្រាប់អ្នកបម្រើការនៅរោងចក្រផលិតរថយន្ត ដោយសារតែចំនួនអ្នកចាក់នៅមានកម្រិតទាបនៅឡើយ។ របាយការណ៍ក៏បង្ហាញផងដែរថា ក្នុងចំណោមអ្នកបម្រើការជាង២៣០០០នាក់នៅរោងចក្ររថយន្តទាំង៣ មានតែជិត៦០០០នាក់ប៉ុណ្ណោះដែលបានចាក់វ៉ាក់សាំង។

 

បច្ចុប្បន្នឥណ្ឌាមានអ្នកឆ្លងកូវីដ-១៩ ជិត៣០លាននាក់ ដោយស្ថិតនៅលំដាប់ទី២បន្ទាប់ពីសហរដ្ឋអាមេរិក។ អ្នកស្លាប់ដោយសារកូវីដ-១៩ នៅឥណ្ឌាមានជាង៣៨,៨ម៉ឺននាក់ ដែលជាចំនួនច្រើនបំផុតបន្ទាប់ពីសហរដ្ឋអាមេរិក និងប្រេស៊ីល៕