ចាប់តាំងពីចុងឆ្នាំ២០១៩ មក អូស្រ្តាលី និងចិន បានដាក់ពន្ធលើផលិតនាំចូលរៀងៗខ្លួន។ នៅឆ្នាំ២០១៩ អូស្រ្តាលី បានយកពន្ធបន្ថែមលើកង់រថភ្លើង និងកង្ហារផលិតថាមពលអគ្គិសនី។ នៅចុងឆ្នាំ២០២០ ចិនបានសងសឹកវិញ តាមរយៈការដំឡើងពន្ធ ២១៨ភាគរយលើស្រារបស់អូស្រា្តលី។ ទាក់ទិននឹងបញ្ហានេះ នៅថ្ងៃទី១៩ ខែមិថុនា អូស្រ្តាលីបានដាក់ពាក្យបណ្ដឹងទៅកាន់អង្គការពាណិជ្ជកម្មពិភពលោក (WTO) ពាក់ព័ន្ធនឹងការដំឡើងពន្ធនាំចូលស្រាពីសំណាក់ចិន។ 

 

ប៉ុន្មានថ្ងៃបន្ទាប់ ក្រសួងពាណិជ្ជកម្មចិន ក៏បានដាក់ពាក្យបណ្តឹងទៅអង្គការពាណិជ្ជកម្មពិភពលោកដែរ ដើម្បីតតាំងជាមួយពន្ធប្រឆាំងនឹងការលក់បង្ខូចថ្លៃរបស់អូស្រ្តាលី។ «វាមានបំណងការពារសិទ្ធិស្របច្បាប់ និងផលប្រយោជន៍របស់ក្រុមហ៊ុនចិន»។ អ្នកនាំពាក្យក្រសួងពាណិជ្ជកម្មចិន លោក Gao Feng បានថ្លែងបែបនេះ នៅក្នុងសន្និសីទសារព័ត៌មានមួយ នៅថ្ងៃទី២៤ ខែមិថុនា។

 

បើតាមក្រសួងពាណិជ្ជកម្ម ចិនសង្ឃឹមថា អូស្រ្តាលីនឹងចាត់វិធានការឱ្យបានសមស្រប ក្នុងការកែកំហុសរបស់ខ្លួន, ចៀសវាងការបន្លំនៅក្នុងការធ្វើពាណិជ្ជកម្ម និងធ្វើឱ្យពាណិជ្ជកម្មរវាងប្រទេសទាំងពីរដើរលើផ្លូវត្រូវវិញ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

នៅថ្ងៃទី២១ ខែមិថុនា កន្លងមក លោក Gao បានលើកឡើងថា ចិនជំទាស់ នឹងការបំពានមធ្យោបាយស្របច្បាប់លើពាណិជ្ជកម្ម ដែលមិនត្រឹមតែប៉ះពាល់ដល់ផលប្រយោជន៍របស់ក្រុមហ៊ុនចិនប៉ុណ្ណោះទេ ប៉ុន្តែក៏ផ្តល់ផលវិបាកដល់អង្គការពាណិជ្ជកម្មពិភពលោកផងដែរ។ 

 

គួររំលឹកថា នៅដើមខែមិថុនាកន្លងមក ក្រុមប្រទេសអ្នកមានទាំងប្រាំពីរ (G7) បានអំពាវនាវចាត់វិធានការប្រឆាំងនឹងការអនុវត្តពាណិជ្ជកម្ម និងការកើនឡើងឥទ្ធិពលរបស់ចិន។ មិនតែប៉ុណ្ណោះ ក្រុមប្រទេសមានសេដ្ឋកិច្ចជឿនលឿនទាំងប្រាំពីរ ក៏បានដាក់ចេញគម្រោង Build Back Better World ដើម្បីទប់ជាមួយគំនិតផ្តួចផ្តើម «ផ្លូវ និងខ្សែក្រវាត់» របស់ចិនផងដែរ៕