តាមរយៈសារជាសំឡេងជាង២នាទីរបស់លោកស្រី ឱ វណ្ណឌីន នៅក្នុងប្រព័ន្ធទំនាក់ទំនងសង្គមតេលេក្រាម បានបញ្ជាក់ថា មកដល់ពេលនេះ ក្រៅតែពីមានវ៉ាក់សាំងចាក់សម្រាប់បង្ការកូវីដ-១៩ គឺគ្មានឱសថណា អាចការពារ ឬព្យាបាលជំងឺនេះបានឡើយ។ ការអះអាងរបស់រដ្ឋលេខាធិការនិងជាអ្នកនាំពាក្យរបស់ក្រសួងសុខាភិបាលរូបនេះ  គឺធ្វើឡើងបន្ទាប់ពីមានប្រជាពលរដ្ឋមួយចំនួន បានផ្អើលទៅទិញថ្នាំការពារកូវីដ-១៩ នៅតាមឱសថស្ថាននានា។ 

 

លោកស្រី ឱ វណ្ណឌីន មានប្រសាសន៍ដូច្នេះ៖«ក្រៅតែពីមានវ៉ាក់សាំងចាក់បង្ការជំងឺកូវីដ-១៩ គឺមិនមានឱសថណាដែលបានបញ្ជាក់ថា ជាឱសថសម្រាប់ការពារជំងឺកូវីដ-១៩ទេ»។ ជាមួយគ្នានេះ លោកស្រី ក៏បានអំពាវនាវដល់ពលរដ្ឋទាំងអស់ កុំជឿទៅតាមការឃោសនានានារបស់បុគ្គលមួយចំនួនដែលធ្វើឱ្យបាត់បង់ថវិកា និងមានបញ្ហាលើសុខភាព៕