ដោយៈ ចាន់ ស៊ីណា 

 

 

មីយ៉ាន់ម៉ា ធ្លាក់ក្នុងវិបត្តិផ្ទៃក្នុងប្រទេសចាប់តាំងពីរដ្ឋប្រហារថ្ងៃទី១ ខែកុម្ភៈមក ពេលដែលក្រុមយោធាដណ្ដើមអំណាច និងទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ចេញពីតំណែង។ ប្រជាជនមីយ៉ាន់ម៉ាជាច្រើនត្រូវបានសម្លាប់ក្នុងការបង្រ្កាបរបស់យោធា និងការប៉ះទង្គិចរវាងកងទ័ព ជាមួយក្រុមកម្លាំងតស៊ូរបស់ប្រជាជន។

 

ការិយាល័យអង្គការសហប្រជាជាតិសម្រាប់ការ សម្របសម្រួលកិច្ចការមនុស្សធម៌ (OCHA) បានអះអាងថា ប្រតិបត្តិការសង្រ្គោះប្រជាជនមីយ៉ាន់ម៉ាកំពុងធ្វើឡើង តែត្រូវបានរារាំងដោយការប៉ះទង្គិចប្រដាប់អាវុធ អំពើហិង្សា និងអសន្តិសុខនៅក្នុងប្រទេស។

 

បើតាម OCHA ប្រជាជនមីយ៉ាន់ម៉ា១៧៧,០០០នាក់ ត្រូវរត់ចេញពីផ្ទះសម្បែងនៅក្នុងតំបន់ Karen ជាប់ព្រំដែននថៃ ដោយក្នុងនោះ១០៣,០០០នាក់បានផ្លាស់លំនៅឋាននៅខែឧសភាតែមួយគត់។ លើសពីនេះ ប្រជាជនមីយ៉ាន់ម៉ាប្រមាណជាង២ ម៉ឺននាក់ផ្សេងទៀត កំពុងរស់នៅជម្រកបណ្ដោះអាសន្នតាមតំបន់ជាង ១០០ ផ្សេងៗគ្នាក្នុងរដ្ឋ Chin ជាប់ព្រំដែនជាមួយឥណ្ឌា។

 

ជាមួយគ្នានេះ ប្រជាជនរាប់ពាន់នាក់បានភៀសខ្លួនចេញពីការប្រយុទ្ធនៅរដ្ឋ Kachin និងរដ្ឋ Shan ដែលនៅភាគខាងជើងមីយ៉ាន់ម៉ា។ រដ្ឋទាំងពីរនេះ ជាតំបន់ប្រមូលផ្តុំកងទ័ពជនជាតិភាគតិច ដែលតែងប៉ះទង្គិចជាមួយកងទ័ពរដ្ឋាភិបាលយូរមកហើយ។

 

សហភាពជាតិ Karen (KNU) ជាក្រុមជនជាតិភាគតិចចំណាស់ជាងគេ បានបង្ហាញពីក្តីព្រួយបារម្ភពីការបាត់បង់អាយុជីវិតរបស់ជនស៊ីវិល ការកើនឡើងនៃអំពើហិង្សា ក៏ដូចជាការប្រើប្រាស់កម្លាំងហួសប្រមាណពីសំណាក់រដ្ឋាភិបាលនៅទូទាំងមីយ៉ាន់ម៉ា។ ក្នុងសេចក្ដីថ្លែងការណ៍មួយ KNU ប្ដេជ្ញាប្រយុទ្ធនឹងរបបផ្ដាច់ការ និងផ្តល់ការការពារកាន់តែខ្លាំងឱ្យប្រជាជន និងជនស៊ីវិលដែលគ្មានអាវុធតាមដែលអាចធ្វើទៅបាន៕