ជាតិ
សង្គមជាតិ
×![]()
ដោយ: ថ្មីៗ
ដោយ៖ ប៉ូ សុភា
ភ្នំពេញ៖ ឆ្កែព្រៃប្រភេទកម្រ ត្រូវបានម៉ាស៊ីនស្វ័យប្រវត្តិថតបាន នៅតាមតំបន់ការពារធម្មជាតិ នៃខ្ពង់រាបភាគខាងកើត និងតំបន់ជួរភ្នំក្រវាញកណ្តាល ក្នុងប្រទេសកម្ពុជា។ វត្តមានសត្វកម្រដែលថតបានកន្លងមក អាចជាក្ដីសង្ឃឹមសម្រាប់អ្នកអភិរក្ស និងអ្នកបរិស្ថាននិយម។
ក្រសួងបរិស្ថាន នៅថ្ងៃទី២៦ ខែមិថុនា បានឱ្យដឹងថា ឆ្កែព្រៃជាភាសាបច្ចេកទេស Dhole ឬក៏ Asiatic wild dog (Cuon alpinus) ជាពពួកមំសាសត្វមាឌធំ និងត្រូវបានចាត់ថ្នាក់ជាប្រភេទជិតផុតពូជ (Endangered) នៅក្នុងបញ្ជីក្រហមរបស់ IUCN ។
លោក នេត្រ ភក្ត្រា អ្នកនាំពាក្យក្រសួងបរិស្ថាន បានបញ្ជាក់ថា ប៉ុន្មានខែចុងក្រោយនេះ ឆ្កែព្រៃត្រូវបានក្រុមអ្នកជំនាញថតបាន តាមរយៈម៉ាស៊ីនថតស្វ័យប្រវត្តិ ក្នុងដែនជម្រកមួយចំនួន ដូចជា ដែនជម្រកសត្វព្រៃភ្នំសំកុស ក្នុងខេត្តពោធិ៍សាត់ ,ឧទ្យានជាតិវីរៈជ័យក្នុងខេត្តរតនគិរី រួមទាំងដែនជម្រកសត្វព្រៃស្រែពក ដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីម៉ាជាដើម។
អ្នកនាំពាក្យរូបនេះ បញ្ជា្កថា៖ « តាមរយៈម៉ាស៊ីនថតស្វ័យប្រវត្តិ បានចាប់បានរូបភាពនៃប្រភេទសត្វទាំងនេះរួមនឹងកូនតូចៗផងដែរ ទាំងនេះគឺជាសញ្ញាណដ៏ល្អមួយនៃជីវៈចម្រុះនៅកម្ពុជា ដែលមានប្រភេទសត្វកម្រដូចជាសត្វឆ្កែព្រៃនេះ។ វាបានបង្ហាញវត្តមាននៅតាមតំបន់មួយចំនួន នេះអាចជាសញ្ញានៃការកើនឡើង»។
ឆ្កែព្រៃ ភាគច្រើនរស់នៅក្នុងព្រៃស្រោង ព្រៃពាក់កណ្តាលស្រោង ព្រៃល្បោះចម្រុះ និងព្រៃល្បោះ នៅក្នុងតំបន់ការពារធម្មជាតិនៅភូមិភាគឦសាន ភូមិភាគខាងជើង និងភូមិភាគនិរតី នៃប្រទេសកម្ពុជា។ ឆ្កែព្រៃខុសពីសត្វចចក វាចូលចិត្តរស់នៅជាហ្វូងធំៗ អាចមានរហូតដល់ជាងដប់ក្បាល ដែលបង្កលក្ខណៈងាយស្រួលក្នុងការប្រមាញ់ចំណី និងទប់ទល់នឹងសត្រូវ។
នេះបើយើងតាមលោក ពិន ច័ន្ទរតនា ប្រធានក្រុមការងារស្រាវជ្រាវនៃនាយកដ្ឋានអភិរក្សតំបន់ការពារធម្មជាតិដីគោកខាងកើតទន្លេមេគង្គ នៃក្រសួងបរិស្ថាន។ លោក រតនា បន្តថា បច្ចុប្បន្នសត្វប្រភេទនេះ ក៏កំពុងរងគំរាមកំហែងការដាក់អន្ទាក់ បាត់បង់ទីជម្រក ខ្វះចំនី និងការចម្លងជំងឺពីឆ្កែស្រុកជាដើម។
សូមបញ្ជាក់ថា នៅថ្ងៃទី ២៤ខែមិថុនា ក្រសួងបរិស្ថានក៏បានប្រកាសពីវត្តមានសត្វ«ឈ្លូសយក្យ»កម្រមួយក្បាលត្រូវបានថតដោយម៉ាស៊ីនថតស្វ័យប្រវត្តិ នៅភូមិសាស្ត្រខេត្តរតនៈគិរី ក្នុងឧទ្យានជាតិវីរៈជ័យនៅចន្លោះខែមីនា ដល់ខែឧសភា ឆ្នាំ២០២១ផងដែរ៕
Tag:
ប្រសួងបរិស្ថាន
ឆ្កែព្រៃកម្រ
© រក្សាសិទ្ធិដោយ thmeythmey.com
