«យើងត្រូវតាមដានការចេញចូលរបស់អ្នកគាំទ្រឱ្យបានល្អិតល្អន់ជាងមុន»។ លោកស្រី Catherine Smallwood មន្ត្រីជាន់ខ្ពស់របស់ WHO ប្រចាំតំបន់អឺរ៉ុប អះអាងក្នុងសន្និសីទសារព័ត៌មានដូច្នេះក្រោយមានការកើនឡើងចំនួនអ្នកឆ្លងកូវីដ-១៩ នៅក្រុងឡុងដ៍ និង Saint Petersburg របស់រុស្ស៊ី។
 

នៅពេលសួរថា តើការប្រកួតជើងឯកអឺរ៉ុប អាចជាព្រឹត្តិការណ៍ដែលនាំឱ្យរីករាលដាលជំងឺរាតត្បាតកាន់តែខ្លាំងឬទេ? លោក Hans Kluge នាយកអង្គការសុខភាពពិភពលោកប្រចាំទ្វីបអឺរ៉ុបឆ្លើយភ្លាមថា៖ «ខ្ញុំសង្ឃឹមថាអត់ទេ…ប៉ុន្តែរឿងនេះក៏នឹងអាចរាប់បញ្ចូលដែរ»។ នេះបើតាមការផ្សាយរបស់ទីភ្នាក់ងារព័ត៌មាន AFP។
 

ករណីឆ្លងកូវីដ-១៩ ច្រើន ត្រូវបានរកឃើញក្នុងចំណោមអ្នកដែលបានទៅទស្សនាការប្រកួត Euro 2020 ក្នុងនោះអ្នកគាំទ្រក្រុមជម្រើសជាតិស្កុតឡែនជិត២ពាន់នាក់ បានធ្វើតេស្តចេញលទ្ធផលវិជ្ជមានកូវីដ-១៩។ អ្នកគាំទ្រស្កុតឡែនដែលឆ្លង ភាគច្រើនជាអ្នកទៅកីឡដ្ឋាន Wembley នាជំនួបអង់គ្លេសជាមួយស្កុតឡែន។
 

ដោយឡែកអ្នកគាំទ្រហ្វាំងឡង់ ក៏រកឃើញថាឆ្លងកូវីដ-១៩ ចំនួនច្រើនដែរ បន្ទាប់ពីពួកគេត្រឡប់ពីក្រុង Saint Petersburg ប្រទេសរុស្ស៊ី និងក្រុងកូប៉ិនហាករបស់ដាណឺម៉ាក ដែលបច្ចុប្បន្នកំពុងរាលដាលកាន់តែខ្លាំង។
 

ក្រោយមានអ្នកឆ្លងកូវីដ-១៩ កើនឡើងនៅតំបន់អឺរ៉ុប ដែលសុទ្ធសឹងជាប់ពាក់ព័ន្ធនឹងការប្រកួត Euro 2020 អ្នកស្រី Smallwood មន្ត្រីជាន់ខ្ពស់របស់ WHO ប្រចាំតំបន់អឺរ៉ុបបានណែនាំឱ្យអ្នករៀបចំព្រឹត្តិការណ៍បន្ថែមការតាមដានចំនួនមនុស្សដែលបានចេញចូលនៅកីឡដ្ឋាន ដោយកំណត់អត្តសញ្ញានពួកគេឱ្យបានច្បាស់លាស់។
 

យ៉ាងណាក៏ដោយ លោកស្រី Smallwood ជឿជាក់ថាការប្រមូលផ្តុំរបស់អ្នកគាំទ្រនៅក្រៅកីឡដ្ឋាន និងនៅតាមក្លិបកម្សាន្តនានាដែលតូចចង្អៀតអំឡុងការប្រកួត និងក្រោយការប្រកួត នឹងធ្វើឱ្យករណីឆ្លងកើនឡើងកាន់តែខ្លាំងដដែល៕