កូវីដ-១៩៖ បាត់ដំបង ៥៧នាក់ និង៤៧នាក់នៅកំពង់ចាម ខណៈអ្នកស្លាប់ដល់ទៅ៥នាក់

COVID-19

ជាតិ

កូវីដ-១៩៖ បាត់ដំបង ៥៧នាក់ និង៤៧នាក់នៅកំពង់ចាម ខណៈអ្នកស្លាប់ដល់ទៅ៥នាក់

05, Jul 2021 , 4:03 pm

រូបភាព

ដោយ: សារព័ត៌មានថ្មីៗ

ខេត្តបាត់ដំបង បន្តរកឃើញអ្នកវិជ្ជមានកូវីដ-១៩ ចំនួន ៥៧នាក់ទៀត នៅថ្ងៃទី៤ ខែកក្កដា ខណៈអ្នកជាសះស្បើយមានតែ៣នាក់ប៉ុណ្ណោះ។ ដោយឡែកខេត្តកំពង់ចាម ក៏មាន ៤៧នាក់បន្ថែមដែរ ខណៈអ្នកសះស្បើយមាន ៤៣នាក់ និងអ្នកស្លាប់មានដល់ទៅ៥នាក់។ ខេត្តព្រៃវែង ក៏មាន៤២នាក់ដែរ ហើយត្បូងឃ្មុំមាន ៣៥នាក់។ ខេត្តរតនគិរី និងកំពង់ឆ្នាំង មាន ១៦នាក់រៀងខ្លួន ខណៈមណ្ឌលគិរីមាន ១០នាក់ និងនៅក្រចេះមាន ៦នាក់។

បាត់ដំបង៖ ករណីថ្មី ៥៧នាក់ និង៣នាក់បានជាសះស្បើយ

មនុស្សចំនួន ៥៧នាក់ មានតេស្តវិជ្ជមានកូវីដ-១៩ ខណៈអ្នកជំងឺ ៣នាក់ បានជាសះស្បើយ។ ក្នុងចំណោមអ្នកវិជ្ជមានទាំង ៥៧នាក់នោះ មាន២៦នាក់ជាករណីនាំចូលពីប្រទេសថៃ។ ពលរដ្ឋដែលរស់នៅក្រុងបាត់ដំបង, ស្រុកមោងឫស្សី, រុក្ខគិរី, សង្កែ, ថ្មគោល, បវេល, សំពៅលូន, កំវៀង, ឯកភ្នំ និងស្រុករតនមណ្ឌល។ អ្នកជំងឺម្នាក់អាអ្នករាជធានីភ្នំពេញ, ២នាក់ជាអ្នកបន្ទាយមានជ័យ និងម្នាក់ទៀតជាអ្នកខេត្តព្រៃវែង។ បច្ចុប្បន្ន ខេត្តបាត់ដំបង មានអ្នកកើតកូវីដ-១៩ សរុប ១១៧៦នាក់ ក្នុងនោះ៦១២នាក់ បានជាសះស្បើយ ៧នាក់ស្លាប់ និងអ្នកជំងឺ ៥៥៧នាក់ កំពុងសម្រាកព្យាបាល។

កំពង់ចាម៖ ឆ្លងថ្មី ៤៧នាក់ ៤៣នាក់សះស្បើយ និងស្លាប់៥នាក់

ពលរដ្ឋចំនួន ៤៧នាក់ទៀត មានវិជ្ជមានកូវីដ-១៩ និងមានអ្នកជំងឺចំនួន ៤៣នាក់បានជាសះស្បើយ។ ក្នុងចំណោមអ្នកវិជ្ជមានទាំង ៤៧នាក់នោះ មាន ២៤នាក់ជាពលរដ្ឋរស់នៅស្រុកស្ទឹងត្រង់, ១៥នាក់នៅស្រុកជើងព្រៃ, ៣នាក់នៅស្រុកកំពង់សៀម, ២នាក់នៅក្រុងកំពង់ចាម ខណៈស្រុកព្រៃឈរ និងស្រុកបាធាយមាន១នាក់រៀងខ្លួន។ អ្នកជំងឺម្នាក់ទៀត ជាអ្នកខេត្តកណ្តាល។ ទន្ទឹមនឹងនេះ រដ្ឋបាលខេត្ត ក៏ទើបប្រកាសថា មានអ្នកជំងឺ ៥នាក់ បានស្លាប់ដោយសារកូវីដ -១៩ នៅចន្លោះថ្ងៃទី២ ដល់ទី៤កក្កដា។ ក្នុងចំណោមអ្នកទាំង ៥នាក់នេះ មានស្ត្រីអាយុ ៧២ឆ្នាំ រស់នៅភូមិត្រកូន ឃុំក្រឡា ស្រុកកំពង់សៀម។ អ្នកជំងឺរូបនេះ បាត់បង់ជីវិតនៅថ្ងៃទី ២កក្កដា។ ស្ត្រីមួយរូបទៀត អាយុ៤១ឆ្នាំ រស់នៅភូមិផៅជុំកើត ឃុំផ្តៅជុំ ស្រុកជើងព្រៃ។ អ្នកជំងឺបានបាត់បង់ជីវិតនៅ៣កក្កដា។
ម្នាក់ទៀតបានស្លាប់នៅ២កក្កដា គឺជាស្ត្រី វ័យ៦៩នាក់ រស់នៅភូមិស្វាយពក ឃុំបាធាយ ស្រុកបាធាយ។ អ្នកស្លាប់ម្នាក់ទៀត ជាបុរស វ័យ ៤៣ឆ្នាំ រស់នៅភូមិវាលស្បូវ ឃុំអំពិល ស្រុកកំពង់សៀម។ អ្នកជំងឺរូបនេះ បានស្លាប់នៅថ្ងៃទី ៣ខែកក្កដា។ ចំណែកករណីស្លាប់ទី ៥ គឺជាស្ត្រីវ័យ៥២ឆ្នាំ រស់នៅភូមិហាន់ទ្វា ឃុំរំលង ស្រុកតាំងគោក ខេត្តកំពង់ធំ ហើយគាត់បានបាត់បង់ជីវិត នៅថ្ងៃទី៤ ខែកក្កដា។

បច្ចុប្បន្ន មានអ្នកជំងឺ ១៦០៤នាក់ហើយបានជាសះស្បើយពីជំងឺកូវីដ-១៩ ខណៈអ្នកកំពុងសម្រាកព្យាបាលមានចំនួន ៧២៥នាក់ទៀត។ អាជ្ញាធរខេត្តកំពង់ចាម មិនបង្ហាញតួលេខអ្នកវិជ្ជមានកូវីដ-១៩ សរុប និងចំនួនអ្នកដែលបានស្លាប់ពាក់ព័ន្ធនឹងកូវីដ-១៩នោះទេ នៅក្នុងរបាយការណ៍ប្រចាំរបស់ខ្លួន។

ព្រៃវែង៖ មាន៤២នាក់ទៀត ភាគច្រើននៅស្រុកពាមរក៍

ក្នុងចំណោមអ្នកឆ្លងថ្មីទាំង ៤២នាក់នោះ មាន ១៤នាក់ ជាពលរដ្ឋនៅស្រុកពាមរក៍ ខណៈស្រុកស្វាយអន្ទរ និងស្រុកពាមជរមាន៥នាក់រៀងខ្លួន។ ពលរដ្ឋស្រុកព្រះស្តេចមាន ៤នាក់ និងក្រុងព្រៃវែង ស្រុកកំចាយមារ និងស្រុកពារាំង មាន៣នាក់រៀងខ្លួន។ អ្នកជំងឺ២នាក់នៅស្រុកមេសាង ខណៈស្រុកបាភ្នំ ស៊ីធរកណ្តាល និងស្រុកកញ្ច្រៀចមាន ១នាក់រៀងខ្លួន។ បច្ចុប្បន្ន ខេត្តព្រៃវែង រកឃើញអ្នកកើតកូវីដ-១៩ ចំនួន ១៧៦៦នាក់ ក្នុងនោះមាន១២៧៥នាក់ បានជាសះស្បើយ ២៥នាក់បានស្លាប់ និងអ្នកជំងឺដែលកំពុងសម្រាកព្យាបាល មានចំនួន ៥៦៦នាក់។

ត្បូងឃ្មុំ៖ មាន៣៥នាក់បន្ថែម និង១៣នាក់ជាសះស្បើយ

មនុស្ស ៣៥នាក់ទៀត បានឆ្លងកូវីដ-១៩ និងមានអ្នកជំងឺ ១៣នាក់ បានជាសះស្បើយ។ ក្នុងចំណោមអ្នកឆ្លងថ្មីទាំង ៣៥នាក់នោះ ភាគច្រើនជាងកសិករ។ ក៏មានដែរព្រះសង្ឃ សិស្ស, អាជីវករ ពលករ និងបុគ្គលិកធនាគារ។ អ្នកវិជ្ជមានទាំងនោះ មានអាសយដ្ឋាននៅស្រុកត្បូងឃ្មុំ អូររាំងឪ ពញាក្រែក ក្រូចឆ្មារ តំបែរ និងស្រុកមេមត់។

រតនគិរី៖ ឆ្លងថ្មី ១៦នាក់ និង៤០នាក់ជាសះស្បើយ

អ្នកជំងឺ ៤០នាក់ បានជាះសះស្បើយ និងអ្នកឆ្លងថ្មីមាន១៦នាក់បន្ថែម។ ក្នុងចំណោមអ្នកវិជ្ជមានទាំង ១៦នាក់នោះ មាន៧នាក់ជាអ្នករស់នៅក្រុងបានលុង , ៥នាក់រស់នៅស្រុកវឺនសៃ, ២នាក់នៅស្រុកកូនមុំ និង១នាក់នៅស្រុកអូរយ៉ាដាវ។ អ្នកជំងឺម្នាក់ជាពលរដ្ឋនៅស្រុកកំពង់ត្រឡាច ខេត្តកំពង់ឆ្នាំង។ បច្ចុប្បន្ន ខេត្តរតនគិរី មានអ្នកវិជ្ជមានកូវីដ-១៩ ចំនួន ៥០៥នាក់ ក្នុងនោះ១០១នាក់បានជាសះស្បើយ ស្លាប់៤នាក់ និងអ្នកជំងឺ ៤៥០នាក់កំពុងសម្រាកព្យាបាល។

កំពង់ឆ្នាំង៖ មាន១៦នាក់ទៀត និងជាសះស្បើយ២២នាក់

អ្នកជំងឺចំនួន ២២នាក់ បានជាសះស្បើយ ប៉ុន្តែរកឃើញករណីវិជ្ជមានថ្មី ១៦នាក់វិញ។ ក្នុងចំណោមករណីថ្មីទាំង ១៦នាក់នេះ មាន ៦នាក់ជាពលរដ្ឋរស់នៅសង្កាត់ប្អេរ, ផ្សារឆ្នាំង និងសង្កាត់កំពង់ឆ្នាំង ក្រុងកំពង់ឆ្នាំង។ ៧នាក់រស់នៅឃុំពពេល ពន្លៃ និងឃុំខុនរ៉ង ស្រុកបរិបូណ៌, ២នាក់នៅឃុំស្វាយជ្រំ និងឃុំជ្រៃបាក់ ស្រុករលាប្អៀរ និងម្នាក់ទៀតរស់នៅឃុំថ្មឥដ្ឋ ស្រុកកំពង់ត្រឡាច។ បច្ចុប្បន្នខេត្តកំពង់ឆ្នាំ មានអ្នកឆ្លងកូវីដ-១៩ ចំនួន ៦៧៣នាក់ ក្នុងនោះ៤០៥នាក់ បានជាសះស្បើយ ១៤នាក់ស្លាប់ និងអ្នកជំងឺ៣៥៤នាក់ទៀត កំពុងសម្រាកព្យាបាល។

មណ្ឌលគិរី៖ ឆ្លងថ្មី ១០នាក់ និងជាសះស្បើយ ១៤នាក់

អ្នកជំងឺ១៤នាក់ បានជាសះស្បើយ ខណៈអ្នកឆ្លងកូវីដ-១៩ បន្ថែមមាន១០នាក់។ ក្នុងចំណោមអ្នកឆ្លងថ្មីទាំង ១០នាក់នោះមាន ៥នាក់ជាពលរដ្ឋរស់នៅសង្កាត់ស្ពានមានជ័យ ក្រុងសែនមនោរម្យ។ អ្នកជំងឺ៤នាក់ នៅឃុំស្រែខ្ទុម ស្រុកកែវសីមា និងម្នាក់ជាអ្នករស់នៅឃុំស្រែសង្គម ស្រុកកោះញែក។

ក្រចេះ៖ មាន៦នាក់បន្ថែម

ក្នុងចំណោមអ្នកវិជ្ជមានទាំង ៦នាក់នោះ មាន៣នាក់ជាពលរដ្ឋរស់នៅសង្កាត់ក្រចេះ ក្រុងក្រចេះ, ២នាក់ រស់នៅឃុំសំបុក ស្រុកចិត្របូរី។ អ្នកជំងឺម្នាក់ទៀតរស់នៅឃុំកំពង់គរ ស្រុកព្រែកប្រសព្វ។

ឧត្តរមានជ័យ៖ មាន១២០នាក់ ក្នុងនោះ ១០៩នាក់ នាំចូលពីថៃ

អ្នកវិជ្ជមានកូវីដ-១៩ មានចំនយន ១២០នាក់បន្ថែមទៀត ក្នុងនោះមាន១០៩នាក់ ជាករណីនាំចូលពីថៃ។ ទន្ទឹមនឹងនេះ ក៏មានអ្នកជំងឺ ៣៣នាក់ បានជាសះស្បើយដែរ។ ក្នុងចំណោមអ្នកឆ្លងថ្មីទាំង ១២០នាក់នោះ មានពលរដ្ឋរស់នៅខេត្តឧត្តរមានជ័យ បន្ទាយមានជ័យ បាត់ដំបង សៀមរាប កំពង់ធំ ត្បូងឃ្មុំ ព្រៃវែង ពោធិ៍សាត់ កំពត កណ្តាល កោះកុង និងខេត្តតាកែវ។ បច្ចុប្បន្ន ឧត្តរមានជ័យ មានអ្នកវិជ្ជមានកូវីដ-១៩ ចំនួន ៩២៣នាក់ ក្នុងនោះ ៨២០នាក់ជាករណីនាំចូល។ អ្នកជំងឺចំនួន ១៦២នាក់ បានជាសះស្បើយ ៣នាក់ស្លាប់ និង៧៥៨នាក់ទៀត កំពុងសម្រាកព្យាបាល។

កំពត៖ មាន១១០នាក់ទៀត និង១នាក់ស្លាប់

អ្នកវិជ្ជមានថ្មី នៅខេត្តកំពត មាន១១០នាក់ និងមានអ្នកស្លាប់ ម្នាក់បន្ថែមទៀតដែរ។ ក្នុងចំណោមអ្នកឆ្លងថ្មី ភាគច្រើនជាកម្មកររោងចក្រ ហើយក្រៅពីនេះ មានអាជីវករ សិស្ស មេផ្ទះ និងកសិករជាដើម។ អ្នកដែលមានវិជ្ជមាន គឺជាអ្នករស់នៅ ក្រុងកំពត, ស្រុកទឹកឈូ កំពង់ត្រាច ឈូក ដងទង់ អង្គរជ័យ និងស្រុកបន្ទាយមាស។ អ្នកជំងឺមួយចំនួនជាអ្នករស់នៅខេត្តកំពង់ឆ្នាំង កោះកុង ព្រៃវែង ព្រះសីហនុ កំពង់ស្ពឺ និងកំពង់ធំ។ ចំណែកឯករណីស្លាប់ គឺជាស្ត្រីវ័យ ៧២ឆ្នាំ រស់នៅភូមិក្រាំង សង្កាត់ក្រាំងអំពិល ក្រុងកំពត។

កោះកុង៖ ឆ្លងថ្មី ៩៧នាក់ និងជាសះស្បើយ ៣១២នាក់

អ្នកជំងឺ ៣១២នាក់ បានជាសះស្បើយ ខណៈករណីឆ្លងថ្មី មាន៩៧នាក់។ ក្នុងចំណោមអ្នកវិជ្ជមានថ្មីនេះ មាន ៧៥នាក់ជាពលរដ្ឋរស់នៅក្រុងខេមរភូមិន្ទ ហើយក្រៅពីនេះ ជាអ្នកស្រុកអំបិល។

សៀមរាប៖ មាន៩១នាក់បន្ថែម និងស្លាប់២នាក់

មនុស្ស ៩១នាក់ទៀតមានវិជ្ជមានកូវីដ-១៩ ក្នុងនោះនាំចូលពីប្រទេសថៃ ១៣ករណី។ ជាមួយគ្នានេះ មានអ្នកជំងឺ ១៨នាក់បន្ថែមបានជាសះស្បើយ និងអ្នកស្លាប់មាន២នាក់ទៀត ។ អ្នកវិជ្ជមាន មាននៅក្រុងសៀមរាប ស្រុកជីក្រែង សូទ្រនិគម ប្រាសាទបាគង ក្រឡាញ់ ពួក អង្គរជុំ និងស្រុកស្រីស្នំ។ អ្នកជំងឺម្នាក់ មានអាសយដ្ឋាននៅខេត្តកំពង់ធំ។ ចំពោះករណីស្លាប់ គឺជាស្ត្រីវ័យ ៤០ឆ្នាំ រស់នៅភូមិវាល សង្កាត់គោកចក ក្រុងសៀមរាប។ ចំណែកម្នាក់ជាទៀតជាស្ត្រីវ័យ៦៧ឆ្នាំ រស់នៅភូមិអូររបង សង្កាត់មេសរជ្រៃ ស្រុកស្ទឹងត្រង់ ខេត្តកំពង់ចាម។

គិតត្រឹមថ្ងៃទី៤កក្កដា ខេត្តសៀមរាប មានអ្នកវិជ្ជមានកូវីដ-១៩ ចំនួន ១,៥០៨នាក់ ក្នុងនោះ៥៨០នាក់ បានសះស្បើយ ១៧នាក់ស្លាប់ និង៩១១នាក់ កំពុងសម្រាកព្យាបាល។

កំពង់ធំ៖ ករណីថ្មី ២២នាក់ និងសះស្បើយ ៣៣នាក់

អ្នកជំងឺចំនួន ៣៣នាក់ បានជាសះស្បើយ ខណៈករណីថ្មីមាន ២២នាក់។ ក្នុងចំណោមអ្នកឆ្លងថ្មីទាំង ២២នាក់នោះ មានពលរដ្ឋដែលរស់នៅក្រុងស្ទឹងសែន , ស្រុកបារាយណ៍ សន្ទុក សណ្តាន់ ស្ទោង និងស្រុកតាំងគោក។ ខេត្តកំពង់ធំ រកឃើញអ្នកវិជ្ជមានកូវីដ-១៩ សរុប១,០១៨នាក់ គិតត្រឹមថ្ងៃទី៤កក្កដា ដោយក្នុងនោះមាន៤៩៩នាក់ បានជាសះស្បើយ ស្លាប់១៣នាក់ និង៣០៩នាក់ទៀត កំពុងសម្រាកព្យាបាល។

ស្ទឹងត្រែង៖ មាន១៧នាក់ទៀត និងជាសះស្បើយ ២នាក់

ក្នុងចំណោមអ្នកវិជ្ជមានទាង ១៧នាក់នោះ គឺជាអ្នកដែលរស់នៅក្រុងស្ទឹងត្រែងទាំងអស់ ហើយក្នុងនោះមាន៩នាក់ នៅមូលដ្ឋានចម្ការកៅស៊ូ-ឃ្លាំងឈ្មោះតាញ៉ា ចំណុចអូរពងមាន់ ក្នុងភូមិរាជានុកូល សង្កាត់ស្ទឹងត្រែងក្រុងស្ទឹងត្រែង។ ក្រោយរកឃើញការរាលដាលកូវីដ-១៩ អាជ្ញាធរ បានសម្រេចបិទទីតាំង មូលដ្ឋានចម្ការកៅស៊ូ-ឃ្លាំងឈ្មោះតាញ៉ាបណ្តោះអាសន្នផងដែរ។ នៅខេត្តស្ទឹងត្រែង ក៏មានអ្នកជំងឺ ២នាក់បានជាសះស្បើយដែរ។ គិតត្រឹមថ្ងៃតី ៤កក្កដា ខេត្តនេះ មានអ្នកឆ្លងកូវីដ-១៩ សរុប ៣២១នាក់ ក្នុងនោះជាសះស្បើយ ២៣នាក់ និង ២៩៨នាក់ ទៀត កំពុងសម្រាកព្យាបាល។

ព្រះវិហារ៖ មាន៣នាក់បន្ថែមទៀត

ក្នុងចំណោមអ្នកឆ្លងថ្មី ទាំង៣នាក់ មាន២នាក់ជាពលរដ្ឋរស់នៅសង្កាត់កំពង់ប្រណាក ក្រុងព្រះវិហារ និង១នាក់ទៀត ជាអ្នកដែលធ្វើដំណើរពីខេត្តកំពង់ធំ។ គិតត្រឹមថ្ងៃទី៤ ខែកក្កដា ខេត្តព្រះវិហារ រកឃើញអ្នកឆ្លងកូវីដ-១៩ ចំនួន១៥២នាក់ ក្នុងនោះ៤៤នាក់ បានជាសះស្បើយ និង១០៨នាក់ទៀតកំពុងសម្រាកព្យាបាល។

ករណីទូទាំងប្រទេស៖ ឆ្លងថ្មី ៨៩៦នាក់ ជាសះស្បើយ ៦៤៦នាក់ និងស្លាប់២៨នាក់

មនុស្សចំនួន ៨៩៦ នាក់ទៀត តេស្តវិជ្ជមានកូវីដ-១៩ ក្នុងនោះ ២១០នាក់ ជាករណីនាំចូល។ អ្នកជាសះស្បើយ មាន ៦៤៦ នាក់បន្ថែម និងអ្នកជំងឺ ២៨នាក់ទៀតបានស្លាប់។ នេះបើតាមសេចក្តីប្រកាសព័ត៌មាន របស់ក្រសួងសុខាភិបាល នៅថ្ងៃទី៥ ខែកក្កដានេះ។ មកទល់ពេលនេះ កម្ពុជាមានអ្នកឆ្លងកូវីដ-១៩ សរុប ៥៥ ១៨៧ នាក់ ក្នុងនោះ៣ ៣៤០ នាក់ករណីនាំចូល។ អ្នកជាសះស្បើយមាន ៤៧ ៣៨៦ នាក់ និងស្លាប់សរុប ៧៤៨នាក់៕